Մոսկվայի կենտրոնում անցած շաբաթ օրը տեղի է ունեցել բողոքի ակցիա, որի ընթացքում ցուցարարները պահանջել են կառավարության հրաժարականը` Վլադիմիր Պուտինի գլխավորությամբ: НГ-ի փորձագետներն արձանագրում են, որ քաղաքական դաշտում որոշակի փոփոխություններ կան, սակայն հակված չեն ծայրահեղ ընդդիմությանը լուրջ հաջողություններ վերագրելու: Պուշկինի պուրակում հավաքվել է մոտ 1000 մարդ: Նկատելի էր, որ ոստիկանությանը հրահանգված է չխոչընդոտել հանրահավաք անցկացնողներին: Նրանք ընդգծված սիրալիր են եղել:
Հանրահավաքին ելույթ են ունեցել «Համերաշխության» համանախագահ Գարի Կասպարովը, «Ձախ ճակատի» առաջնորդ Սերգեյ Ուդալցովը, «Հանուն մարդու իրավունքների» շարժման ղեկավար Լեւ Պոնոմարյովը, որոնք իրենց ելույթներում պահանջել են Պուտինի հրաժարականը:
Հնչել են մի շարք լրագրողների եւ քաղաքական գործիչների անուններ, որոնք տուժել են գործող վարչակազմից: Սակայն ըստ թերթի՝ ընդդիմության ներկայացուցիչները չեն նշել այս իրավիճակից դուրս գալու ուղիներ: Ինչպես նաեւ չեն նշել, թե ոնց են հասնելու կառավարության հրաժարականին: Եղել են պաստառներ, որոնք հիշեցրել են Միխայիլ Խոդորկովսկուն, եւ հնչել են կոչեր` աջակցելու «Նովայա գազետա» թերթին:
Իշխանությունները արտոնել են նաեւ ամսի 31-ին Տրիումֆալնայա հրապարակում ընդդիմության միջոցառումը, սակայն ընդդիմության առաջնորդները հրաժարվել են թվային սահմանափակումներից: Ինչպես հաղորդում է թերթը, հիմա բանակցություններ են ընթանում:
Հոդվածն ամբողջությամբ կարող եք կարդալ ng.ru կայքում:
