«Արմենպրեսի» նախկին տնօրեն, Հայաստանում ճանաչված լրագրող Տիգրան Հակոբյանի գործով խափանման միջոցը փոխվել է: Այս պահին նա ազատության մեջ է: Նա մեղադրվում էր խոշոր չափի յուրացումներ կատարելու համար:
Գլխավոր դատախազի մամուլի քարտուղար Սոնա Տռուզյանն այս առթիվ «Ազատություն» ռադիոկայանի հետ զրույցում ասել է. – «Կարծում եմ տեղյակ եք նաև, որ թվով 24 զանգվածային լրատվության միջոցների ղեկավարներ դիմել էին գլխավոր դատախազին` խնդրելով մեղադրյալին կալանքից ազատելու որոշում կայացնել: Ուսումնասիրելով այդ խնդրանք-դիմումը, ինչպես նաև գործով ձեռք բերված ապացույցները և նկատի ունենալով, որ Տիգրան Հակոբյանը վերականգնել է պատճառված վնասից 10 միլիոն դրամ և պատրաստակամություն է հայտնել ազատության մեջ գտնվելու դեպքում նույնպես գումարները վերականգնել, ունի մշտական բնակության վայր և բնութագրվում է դրականորեն, ինչպես նաև սրտամկանի կրկնակի ինֆարկտի պատճառով երկու անգամ վիրահատվել է, այսինքն նաև վատառողջ է և ունի բուժման կարիք, ուստիև Գլխավոր դատախազության Կոռուպցիոն և կազմակերպված հանցագործություններով գործերով վարչության որոշմամբ այսօր նրա նկատմամբ ընտրված խափանման միջոցը փոխվել է»:
Նշենք, որ Տիգրան Հակոբյանը հասարակայնության հետ կապերի կառավարման ոլորտի ճանաչված մասնագետներից է, նախկինում զբաղեցրել է «Հայք» թերթի գլխավոր խմբագրի, Հայաստանի Հեռուստառադիոպետկոմի նախագահի, Արմենպրեսի տնօրենի պաշտոնները: Նա մեղադրվում է ավելի քան 184 մլն դրամ հափշտակելու, յուրացնելու մեջ, նրանց մեղադրանք է առաջադրվել Քրեական օրենսգրքի 179 հոդվածի 3-րդ մասի 1-ին կետի «խոշոր չափերով յուրացնելը կամ վատնելը» հատկանիշներով: Տիգրան Հակոբյանի հետ միասին նույն մեղադրանքն է առաջադրվել նաև Հայ Ազգային կոնգրեսի առաջնորդի մամլո խոսնակ Արման Մուսինյանի եղբորը՝ Վահան Մուսինյանին, որը այժմ հետախուզման մեջ է:
