Փետրվարի 28-29-ին տեղի է ունեցել «Մրցակցային օրենսդրության նոր իրավական զարգացումները» թեմայով սեմինար-քննարկում Հայաստանի դատավորների մասնակցությամբ:
ՀՀ Վարչական և ՀՀ Վերաքննիչ վարչական դատարանների դատավորները հնարավորություն են ունեցել ԵՄ փորձագետների հետ քննարկելու մրցակցային օրենսդրությունն ու ԵՄ լավագույն գործելակերպերը, ինչպես նաև տեղեկանալու ԵՄ դատարանների և ազգային դատարանների դերի և լիազորությունների մասին: Դատավորները ԵՄ փորձագետների հետ քննարկել են նաև տնտեսական մրցակցությունը սահմանափակող գործերի քննությանն առնչվող մասնագիտական հարցեր:
Միջոցառման ժամանակ զեկույցներ են ներկայացրել ԵՄ անդամ պետությունների փորձագետները, Գերմանիայի մրցակցային մարմնի նախկին փոխնախագահ Կ. Շթոքմանը, Լիտվայի մրցակցության խորհրդի նախագահ Շարունաս Կեզերաուսկասը: Մասնավորապես նրանք անդրադարձել են ԵՄ Հանձնաժողովի ստուգումներ և հետաքննություն իրականացնելու իրավասությանը, ԵՀ-ի և անդամ պետությունների մրցակցային մարմինների համագործակցությանը, մրցակցային մարմինների և դատարանների միջև տեղեկատվության փոխանակմանը, ինչպես նաև մասնագիտական այլ հարցերի:
Քննարկման մասնակիցների միջև ծավալվել է ակտիվ քննարկում հատկապես Հայաստանի և ԵՀ-ի օրենսդրական ակտերի, իրավասությունների և գործերի քննության վերաբերյալ: Մասնավորապես դատավորներին հետաքրքել է, թե օրենսդրությամբ ինչպես է կարգավորվում տուգանքի վճարումը այն դեպքում, երբ տնտեսվարողը որոշումը բողոքարկել է դատարանում: Կ. Շթոքմանը պատասխանել է, որ նման դեպքերում Գերմանիայում կասեցվում է տուգանքի վճարումը, քանի դեռ դատական վերջնական ակտով որոշում չի կայացվել: Բացի այդ, փորձագետը նշել է, որ նման դեպքերում դատարանի կողմից կայացվող վճիռը խիստ էական է և վճիռն ինչ-որ տեղ նման է մեղադրական եզրակացության, քանի որ դատարանն իրավասու է գործի հետ կապված նոր քննություն սկսել, գործում վկաներ ներգրավվել, տուգանքի չափի փոփոխություն կատարել և այլն:
Հարցի հետ կապված Շ. Կեզերաուսկասը տեղեկացրել է, որ Լիտվայի մրցակցային օրենսդրությամբ բողոքարկված գործերի դեպքում կիրառվում է այլ մոտեցում: Նրա տեղեկացմամբ` դատական բողոքարկումը չի կասեցնում տուգանքի վճարումը: Անկախ ամեն ինչից, տուգանքի ենթարկված տնտեսվարողը պարտավոր է վճարել այն, իսկ եթե դատարանը մրցակցային մարմնի որոշումը ճանաչի անվավեր, ապա հետագա ընթացքը կարգավորվում է օրենսդրությամբ:
Երկու փորձագետներն էլ նշել են, որ եթե տնտեսվարողը դիմում է ներկայացնում տուգանքը մաս մաս վճարելու վերաբերյալ, ապա, հատկապես խոշոր տուգանքների պարագայում ընդառաջում են նրան: Դատավորների կողմից հնչել են նաև հարցեր օրենդրական տարբեր ակտերի, տուգանքների չափի և վճարման, ԵՄ Հանձնաժողովի և ԵՄ անդամ պետությունների մրցակցային մարմինների համագործակցության, համատեղ վարույթների իրականացման և այլ թեմաների վերաբերյալ:
Հայաստանի դատական համակարգի աշխատակիցների համար նախատեսված երկօրյա սեմինարը կազմակերպվել է ԵՀՔ ՀՀ-ԵՄ գործողությունների ծրագրի շրջանակում մեկնարկած «Մրցակցային և պետական օժանդակության օրենսդրության կիրարկման հզորացումը Հայաստանում» թվինինգ ծրագրի ներքո, որի շրջանակներում Հայաստանում նման սեմինար քննարկումներ հաճախ են կազմակերպվում ամենատարբեր ոլորտների և պետական գերատեսչությունների
ներկայացուցիչների մասնակցությամբ:
Իրականացվող ծրագրի վերջնական նպատակը ՀՀ-ում մրցակցային միջավայրի բարելավումն ու ՏՄՊՊՀ կիրարկման կարողությունների հզորացումն է:
Ծրագիրը ֆինանսավորում է Եվրամիությունը, ֆինանսավորման ընդհանուր չափը կազմում է 1.1 մլն եվրո: