Դեկտեմբերի 31-ին Գաբալայի ռադիոտեղորոշիչ կայանում ռուս սպա Սերգեյ Գրաչովի սպանությունը դեռ բացահայտված չէ: Ադրբեջանի զինվորական դատախազի օգնական Շեֆահեթ Իմրանովը «APA»-ին տեղեկացրել է, որ գործը դեռ փակ է, և ձերբակալվածներ չկան: Հետաքննությանը մասնակցում են նաև Ռուսաստանի զինվորական դատախազության աշխատակիցներ, որոնք ադրբեջանցի գործընկերների հետ արդեն նախնական քննչական միջոցառումներ են անցկացրել: Արդեն հայտնի է, որ Ամանորի գիշերը մայոր Գրաչովի տանը հավաքվել են մի խումբ սպաներ, խնջույքի ընթացքում վիճաբանություն է սկսվել, որի ժամանակ էլ սպաները սպանել են Գրաչովին: Այնուհետև նրանք տնից հափշտակել են գումար և ոսկյա զարդեր ու դիմել փախուստի: Ժամանած ոստիկանները Գրաչովի դին գլխատված էին գտել: