«Մոտ 100 տարի առաջ աշխարհահռչակ «Տիտանիկը» սուզվեց Ատլանտյան օվկիանոսի հատակը: Այս կապակցությամբ բրիտանական Henry Aldridge & Son աճուրդի տունն անցկացնում է եզակի աճուրդ»,– տեղեկացնում է Rbc.ru-ն:
Ինչպես հայտնի է, լեգենդար նավն աչքի էր ընկնում բացառիկ ճոխությամբ, հարուստ զարդարանքով, ինչպես նաև՝ ռեստորանի նրբաճաշակ ճաշացանկով: Աճուրդին կներկայացվի պատմական իր`«Տիտանիկի» առաջին կարգի ուղևորների ճաշացանկը: Աճուրդի շուրջ իրարանցումը պայմանավորված է նրանով, որ դա եղել է նավի ուղևորների մեծ մասի վերջին ճաշը: Ճաշացանկը տպվել է 1912 թվականի ապրիլի 14-ին, իսկ 2 հազար 208 մարդու կյանք խլած ողբերգությունը տեղի է ունեցել ապրիլի 15-ի գիշերը:
Ճաշացանկն օվկիանոսի հատակում չէր հայտնվել շնորհիվ դոկտոր Վաշինգտոն Դոջի։ Նա բանկիր էր Սան-Ֆրանցիսկոյից, ով «Տիտանիկով» ճանապարհորդում էր իր կնոջ` Ռութի ու որդու հետ: Ռութը ճաշացանկը վերցրել էր ի հիշատակ` այն դնելով իր պայուսակի մեջ: Այդ օրվանից ճաշացանկը պահվել է նրանց ընտանիքում` որպես ինքնատիպ մասունք:
Ուղևորների վերջին ճաշը կազմված է եղել ձվից, հավից, տավարի մսից, ոչխարի կոտլետներից, տարատեսակ աղանդերներից և պանրի 8 տեսակներից:
Աճուրդի կազմակերպիչներն ակնկալում են ստանալ մոտ 158 000 դոլար:
Հիշեցնենք, որ ողբերգության տարելիցին հայտնի նկարչուհի և դիզայներ Դոդո Նյումանը մի նախագիծ է ներկայացրել. Titanic Project անունով հուշարձանը ստեղծվել է աշխարհի 50 ոսկերչական բրենդների հետ համատեղ և ամբողջությամբ պատրաստված է թանկարժեք քարերից: