Հայ եւ ադրբեջանցի քաղաքագետներ Ստեփան Գրիգորյանը եւ Ռաուֆ Ռաջաբովը հոկտեմբերի 23-ին Թբիլիսիում համատեղ հայտարարություն են ստորագրել, որում մասնավորապես նշում են. «Մենք` Ադրբեջանի եւ Հայաստանի երկու փորձագետներս, Աստանայում դեկտեմբերի 1-2-ը կայանալիք գագաթնաժողովի նախաշեմին մինչ «ճանարապրհային քարտեզի» էությունը ներկայացնելը` փաստում ենք, որ վերջին երկու տարիներին ղարաբաղյան կարգավորման բանակցային գործընթացն ակտիվացել է, եւ որ խաղաղ կարգավորման գործընթացն իրեն չի սպառվել: Կոչ ենք անում կողմերին միասնական դիրքորոշում որդեգրել Մադրիդյան հիմնարար սկզբունքների նկատմամբ, միանալ 2009թ. հուլիսի 10-ին ԱՄՆ, ՌԴ եւ Ֆրանսիայի նախագահների ընդունած եւ 2010 թ. հունիսի 26-ին Մասկոկայում ընդունված հռչակագրերին, հետամուտ լինել 1949թ. Ժնեւյան կոնվենցիային եւ 1977թ.հավելյալ արձանագրություններին»: Այնուհետեւ հայտարարությունը ստորագրած քաղաքագետները ներկայացնում են «ճանապարհային քարտեզի» տարրերը: Հիմնարար սկզբունքներ են` փոխշահավետությունը, փոխլրացումը, փոխկախվածությունը, քաղաքացիական հասարակության կամքը: Որպես hիմնարար սկզբունքների առաջին քայլ` մատնշվում է տրանսպորտի վերաբերյալ Հարավային Կովկասի «Սպիտակ գիրքը»: