Առևտրային անցած շաբաթվա սկզբում ԱՄՆ դոլարը շարունակեց աճը ՀՀ դրամի նկատմամբ՝ առավելագույն մակարդակի հասնելով 2010 թ. մայիսի 11-ից հետո՝ 390.05 դրամ: Սակայն այդ դիրքում հայկական արժույթին ամրապնդվել չհաջողվեց, հնարավոր է, շուկայի մասնակիցները զգուշացել են Կենտրոնական բանկի միջամտությունից ու դադարել են ակտիվորեն դոլար գնել:
Այս շաբաթ ԱՄՆ դոլարն ունի բոլոր հիմքերն աճը շարունակելու համար: FOREX club-ի վերլուծաբաններն «Առաջին լրատվական»-ին հայտնեցին, որ դրա պատճառն այն է, որ այս ժամանակաշրջանում դեպի Հայաստան տրանսֆերտների հոսքը շարունակում է ցածր մնալ: Դոլարի թանկացմանը կնպաստի նաև բնակչության և բիզնեսի կողմից ամերիկյան արժույթի հանդեպ ավելացած պահանջարկը: Եվ իսկապես, ԿԲ մամլո ծառայության համաձայն, ներբանկային արժութային շուկայում անցած շաբաթ առևտրային բանկերը վաճառել են 22.599 մլն դոլար, ինչը 72.87%-ով ավելի է նախորդ շաբաթվանից:
Միաժամանակ, միջազգային արժութային շուկաների մասնակիցների տրամադրության բարելավումը`կապված Հունաստանին 130 մլրդ եվրո հատկացնելու որոշման հետ, կարող է ճնշում գործադրել ԱՄՆ դոլարի վրա ինչպես հիմնական արժույթների, այնպես էլ դրամի նկատմամբ:
Այս շաբաթ ՀՀ-ում ԱՄՆ կանխիկ դոլարի միջին փոխարժեքը, հավանաբար, կգտնվի 388-392 դրամի միջակայքում:
