«Հաղթանակ» զբոսայգու հարակից ժայռաբեկորների ծառազուրկ բարձունքին նախագծվում է կառուցել «Նոյյան Տապան» համալիրը, որի չափերը կհամապատասխանեն Տապանի բնական չափերին՝ 132 մ երկարություն, 22 մ լայնություն, 13 մ բարձրություն:
Այսօր կայացած ասուլիսի ընթացքում նախագծի նախաձեռնող խմբի անդամները ներկայացրին Տապանի կառուցման նպատակները: Ըստ նախաձեռնող խմբի անդամ Մարտուն Հարությունյանի՝ նախատեսվում է կառուցել եռահարկ համալիր. առաջին հարկը կծառայի որպես թանգարան, երկրորդ հարկում կլինեն կոնֆերանս-դահլիճ, կինոթատրոն, գրասենյակներ, երրորդ հարկում կլինեն սենյակներ՝ արտերկրյա հյուրերի համար: Համալիրի վրա գիշերները կլուսարձակվեն լազերային ճառագայթներ՝ Արարատ լեռան պատկերներով:
Նախաձեռնող խմբի մյուս անդամ Կարեն Աղամյանի կարծիքով՝ շատ կարևոր է Հայաստանում այսպիսի համալիրի կառուցումը, քանի որ դրա միջոցով աշխարհն ավելի լավ կիմանա հայերի պատմությունը: Նա նշեց՝ Տապանը կկառուցվի այնպես, որ երևա քաղաքի բոլոր կողմերից, իսկ համալիրից պարզորոշ կերևա Արարատ լեռը:
Նախաձեռնող խմբի անդամների կարծիքով՝ անհրաժեշտ է նախագիծը դնել հանրային քննարկման, որպեսզի հետագայում հանրության շրջանում դժգոհություններ չառաջանան:
Նախագիծն արդեն քննարկման է ներկայացվել քաղաքապետարանում, իսկ վերջում այն կհաստատի հանրապետության նախագահը: Նախատեսվում է համալիրի կառուցումն ավարտել մինչև 2015 թվականը՝ Եղեռնի 100-ամյակին ընդառաջ: Կառուցման բյուջեն կկազմի 20000 մլն դոլար, սակայն պետբյուջեից որևէ գումար չի հատկացվում կառույցին:
