Այսօր Ռուսաստանի վարչապետ և նախագահի թեկնածու Վլադիմիր Պուտինը հանդես է եկել թվով յոթերորդ հոդվածով, որը տպագրվել է «Մոսկովսկիե նովոստի» օրաթերթում: Հոդվածն անդրադառնում է արտաքին քաղաքականությանը: Հրապարակման մեջ Պուտինը հանդես է եկել մի շարք ուշագրավ հայտարարություններով:
Նա համացանցը և սոցցանցերն անվանել է քաղաքականության արդյունավետ գործիքներ, որոնք հաճախ կիրառվում են հասարակական կարծիքը կառավարելու և ինքնիշխան պետությունների ներքին գործերին միջամտելու համար:
Նրա խոսքով՝ «Արաբական գարունը» լավագույնս ցուցադրեց այն, որ միջազգային հանրության կարծիքը մեր օրերում ձևավորվում է ժամանակակից տեղեկատվական տեխնոլոգիաների միջոցով: Պուտինը չի բացառել, որ Արաբական երկրներում տեղի ունեցած զարգացումները պայքար չէին մարդու իրավունքների համար, այլ փորձեր էին՝ տիրելու շուկաներին: Այս առումով նա վտանգված է համարում ռուսական ընկերությունների գործունեությունը տարածաշրջանում, որին նրանք հասել են տասնյակ տարիների աշխատանքի արդյունքում:
Միաժամանակ Պուտինն ասել է, որ իրենք չեն պատրաստվում հետևել այս զարգացումներին կողքից, այլ ակտիվորեն համագործակցելու են Արաբական երկրների իշխանությունների հետ:
«Արաբական աշխարհում տեղի ունեցողը շատ ուսանելի է: Իրադարձությունները ցույց են տալիս, որ ուժային մեթոդներով ժողովրդավարության ներդրումը հաճախ հանգեցնում է հակառակ արդյունքի: Գլուխ են բարձրացնում այն ծայրահեղական ուժերը, որոնք փորձում են փոխել երկրի զարգացման ուղին, աշխարհիկ բնույթը»,- ասել է Պուտինը:
Նա անդրադարձել է նաև ԱՄՆ-Ռուսաստան հարաբերություններին, նրանց կողմից Սիրիայի ներքին գործերին միջամտելուն: Պուտինը հույս է հայտնել, որ հաշվի կառնվի լիբիական փորձը և Սիրիայի ներքին գործերին նման միջամտություն չի ցուցաբերվի:
Համաշխարհային անվտանգությունն, ըստ վարչապետի, չի կարող լինել Ռուսաստանի թուլացման հաշվին. Ռուսաստանը մեծ աշխարհի մի մասն է և չի ցանկանում մեկուսանալ ու մեկուսացվել: Վարչապետը հավելել է, որ Ռուսաստանը վերականգնում է իր արժեքները, ինչը կնպաստի աշխարհում նրա նկատմամբ հարգանքի մեծացմանը:
Պուտինը զգուշացրել է, որ չի կարելի ՄԱԿ-ի գործառույթները վերագրել ՆԱՏՕ-ին, ինչպես դա եղավ վերջին մեկ տարվա ընթացքում: Նաև անթույլատրելի է համարել Հյուսիսային Կորեայի երիտասարդ ղեկավարի «ամրությունը ստուգելու» փորձերը:
