Եվրամիության կողմից Լեռնային Ղարաբաղ առանց նախապայմանների մուտք ունենալը կնպաստի Արցախի ավելի մեծ ներգրավվածությանը միջազգային ընթացիկ գործընթացներում: «Առաջին լրատվական»-ի հետ զրույցում ասաց ԼՂՀ նախկին արտգործնախարար Արման Մելիքյանը՝ այդ առումով դրական գնահատելով ԵՄ նախաձեռնությունը:
«Վերջապես ԵՄ-ն կարծես թե հասկացավ կամ պահը հարմար գտավ անմիջականորեն Արցախ մուտք գործելու համար՝ առանց Ադրբեջանից հատուկ թույլտվություն պահանջելու կամ ստանալու այս նվաստացուցիչ գործընթացի: Դա դրական է»,- ասաց Ա. Մելիքյանը:
Անդրադառնալով այն հարցին, որ եթե ԵՄ-ն ուզում է իր դերակատարումն ընդլայնել հակամարտության կարգավորման հարցում, դա չի՞ նշանակում, որ Ֆրանսիայի հանդեպ որպես անաչառ միջնորդի վստահությունն է նվազել այս հարցում՝ հաշվի առնելով վերջերս Սենատի ընդունած Հայոց ցեղասպանության ժխտումը քրեականացնող օրինագիծը, Ա. Մելիքյանը նշեց, որ Ֆրանսիան, որպես անմիջականորեն Մինսկի խմբի համանախագահ, այն 3 երկրներից մեկն է, որն ըստ էության նախապատրաստում և ուղղորդում է բանակցային գործընթացը: Ըստ նրա՝ ԵՄ ներգրավվածությունն Արցախի հետ հարաբերություններում, ընդ որում՝ առանց Ադրբեջանի հատուկ արտոնության, պարզապես կարող է նշանակել, որ Արցախը ԵՄ և ԵՄ անդամ պետությունների հետ գուցե ինքնուրույն կարողանա առնվազն տնտեսական և մշակութային կապեր հաստատել, որովհետև եթե ԵՄ-ն քաղաքական և դիվանագիտական մակարդակում այնուամենայնիվ նախաձեռնությունը թողնում է Ֆրանսիային, հետևաբար, սա ենթադրել է տալիս, որ ԵՄ-ն ավելի շուտ ներքաշված կլինի մշակութային և տնտեսական ծրագրերի իրականացման և նախապատրաստման մեջ: «Սա, իհարկե, իր հետևանքները կունենա, և կարծում եմ՝ այս ներքաշվածությանը նաև խանդով կվերաբերվեն որոշ, գուցե համանախագահ երկրներ: Բայց այնուամենայնիվ այս գործընթացը բարձրացնում է Արցախի կարգավիճակը՝ որպես թեկուզ չճանաչված, բայց ինքնուրույն պետական կազմավորում»,- նշեց Ա. Մելիքյանը:
