Ինչպես հայտնում է Ռեյթեր գործակալությունը, ԱՄՆ պետքարտուղար Հիլարի Քլինթոնը կիրակի օրը քննադել է Իսրայելի գործողություններ, որը Արևելյան Երուսաղեմում ընդլայնում է հրեական բնակավայրերը:
Ավելի վաղ` կիրակի օրը, իսրայելյան իշխանությունները քանդել են 1930-ական թվականներին կառուցված Shepard հյուրանոցի շենքը Արևելյան Երուսաղեմում, որը պաղեստինցիները համարում են անկախ պաղեստինյան պետության ապագա մայրաքաղաք: Այս վայրում իսրայելական իշխանությունները պլանավորում են կառուցել 20 բնակարան ունեցող շենք հրեա բնակիչների համար:
«Այս շինարարությունը սասանում է խաղաղ ջանքերի արդյունավետությունը, որոնք ուղղված են երկու երկրների միջև կոնֆլիկտի կարգավորմանը: Մասնավորապես, այս քայլը հակասում է երկրների միջև Երուսաղեմի կարգավիճակի հիմնավորված և անհրաժեշտ համաձայնության տրամաբանությանը»,- հայտարարել է Քլինթոնը Աբու Դաբիում ունեցած իր ելույթի ժամանակ, որտեղ ԱՄՆ պետքարտուղարը ժամանել է Պարսից ծոցի երկրներով շրջագայության շրջանակում:
Նրա խոսքերով, ԱՄՆ-ն համարում է, որ խաղաղ բանակցությունները միակ միջոցն են գալու համաձայնության, որը կբավարարի և՛ պաղեստինյան վարչակազմին, և՛ Իսրայելին, այդ իսկ պատճառով Վաշինգտնը կշարունակի ճնշում գործադրել երկու կողմերի վրա:
Անցյալ տարվա սեպտեմբերի սկզբին ԱՄՆ միջնորդությամբ վերսկսված բանակցությունները պաղեստինցիների և Իսրայելի միջև երեք շաբաթ անց հայտնվեցին փակուղում: Պաղեստինցիները կտրականապես հրաժարվեցին շարունակել բանակցությունները իսրայելյան կողմի հետ, մինչև Թել Ավիվը չդադարեցնի Հորդանան գետի Արևմտյան ափի և Արևելյան Երուսաղեմի շինարարությունները: Բացի այդ, Պաղեստինի ազգային ադմինիստրացիան բացառում է կոնֆլիկտի ժամանակավոր լուծումը և պահանջում է լայնամասշտաբ կարգավորում՝ ապագա պաղեստինյան պետության սահմանների հստակ որոշմամբ 1967 թ. սահմաններում, ըստ որի՝ Արևելյան Երուսաղեմը ճանաչվում է որպես իրենց մայրաքաղաք, ինչպես նաև պաղեստինցի փախստականների վերադարձի հարցի կարգավորմամբ: