Աֆղանստանում կոնֆլիկտի հետևանքով փախստականների թիվը հասել է 500 հազարի: Այսպիսի եզրակացություն է կատարվել Amnesty International իրավապաշտպան կազմակերպության հաշվետվության մեջ:
Աֆղանական փախստականների ու տեղահանված անձանց խնդիրներին նվիրված հաշվետվության հեղինակները գրում են, որ Աֆղանստանում կոնֆլիկտի հետևանքով, որտեղ ԱՄՆ-ի ու ՆԱՏՕ-ի ուժերը շարունակում են իրականացնել զինված գործողություններ «Թալիբան» շարժման անդամների դեմ, ներկայում, ի տարբերություն վերջին 10 տարիների, խաղաղ բնակիչներն ավելի շատ են տուժում:
Հետազոտության մեջ, որը ներկայացվել է երեկ, մասնավորապես նշվում է, որ ամեն օր Աֆղանստանում օրական միջինը 400 մարդ է լքում իր բնակության վայրը: Այդ մարդկանց թիվը 2008-ից ի վեր շարունակ աճում է ու ներկայում ասել է 500 հազարի: Մարդկանց մեծ մասը, փրկվելով զինված գործողություններից, ստիպված է եղել փախչել մեծ քաղաքներ` Քաբուլ, Գերատ, Մազարի-Շարիֆ:
Աֆղանստանի մայրաքաղաքում բնակություն են հաստատել 35 հազար փախստականներ, որոնք այժմ բնակվում են տարրական հարմարություններից զուրկ տնակներում: Նրանց մի մասն ինչ-որ ժամանակ ապաստանել էր փախստականների ճամբարներում, որոնք ՄԱԿ-ը բացել էր հարևան Պակիստանում: Այն ժամանակ նրանք ինքնակամ վերադարձան հայրենիք, սակայն տեղում պարզվեց, որ գումարը չի բավականացնում կացարան վարձելու համար ու ամբողջ ընտանիքներով հայտնվեցին փողոցում:
Իրավապաշտպան կազմակերպության տվյալներով՝ փախստականներն ունեն ջրի, սննդի, դեղորայքի կարիք, տիրում է հակասանիտարական վիճակ, տարածվում են հիվանդությունները: Հաշվետվության մեջ նշվում է, որ Քաբուլում հունվարին մինչև 5 տարեկան ավելի քան 20 երեխա է մահացել ցրտից: Հատուկ շեշտվում է, որ երկրի կառավարությունը բավարար ուշադրություն չի դարձնում այդ խնդրի վրա:
Կազմակերպությունն արդեն դիմել է ՄԱԿ-ին, ԱՄՆ-ի ու Աֆղանստանի կառավարություններին` կոչ անելով հավելյալ քայլեր ձեռնարկել ` փախստականների վիճակը թեթևացնելու համար:
