Իսպանիայի առաջնության 18-րդ տուրի կենտրոնական հանդիպումը կայացավ «Սանտյագո Բերնաբեու» մարզադաշտում. 6 խփված գնդակ, բազում զգուշացումներ, 1 հեռացում: Հյուրերի տարածքային և խաղային առավելությունը առաջին խաղակեսում, «Ռեալ»-ի պատասխանը երկրորդ խաղակեսում, Մոուրինյոյի հերթական բեմականացումը, մի խոսքով ֆուտբոլային երեկոն Մադրիդում կարելի է կայացած համարել: Հանդիպման 18-րդ րոպեին արդեն հյուրերն առջևում էին 1:2 հաշվով: Կանիի ու Ռուբենի գոլերին պատասխանեց Ռոնալդուն:
Առաջին խաղակեսի վերջին րոպեին տուգանայինի խաղարկումից հետո նույն Ռոնալդուն գլխի հարվածով հավասարեցրեց հաշիվը: Ընդմիջումից հետո իր խոսքն ասեց նաև Մոուրինյոն, ով սկզբում Լասին փոխարինեց Խեդիրայով, այնուհետև կենտրոնական պաշտպան Ալբիոլի փոխարեն խաղադաշտ մտցրեց վնասվածքից նոր ապաքինված Կակային: Մադրիդցիների ճնշումը Լոպեսի դարպասին գնալով ուժեղանում էր, ինչը 80-րդ րոպեին տվեց իր արդյունքը` Ռոնալդուն, ով երևի աշխարհում միակ ֆուտբոլիստն է, որ կարող է մի քանի վայրկյանների ընթացքում ընկած տեղից հարվածել դարպասին, փոխանցում կատարել խաղընկերոջը, այնուհետև մեկ ակնթարթում կանգնել, շրջվել ու գոլային հարված կատարել, առաջ մղեց «արքայական» ակումբին: 2 րոպե անց Ռոնալդուի փոխանցումից հետո հանդիպման վերջին գոլը խփեց Կական` 4:2:
Կիրակնօրյա մյուս հանդիպումներում գրանցվեցին հետևյալ արդյունքները` «Էսպանյոլ»-«Սարագոսա»` 4:0, «Մալյորկա»-«Ալմերիա»` 4:1, «Օսասունա»-«Խետաֆե»` 0:0, «Ռասինգ»-«Սպորտինգ»` 1:1, «Լևանտե»-«Վալենսիա»` 0:1:
Շաբաթ օրը կայացած խաղերին արդեն անդրադարձել ենք, իսկ «Հերկուլես»-«Ատլետիկո Մադրիդ» հանդիպումը կկայա այսօր:
