Թուրքիայի վարչապետ Ռեջեփ Թայիփ Էրդողանը հանգստյան օրերին պահանջել է քանդել Թուրքիայի և Հայասանի բարեկամությունը խորհրդանշող հուշարձանը` դրանով իսկ ցույց տալով սահմանի բացման գործընթացի և երկու հարևան երկրների հարաբերությունների կարգավորման ճգնաժամի խորացումը:
Էրդողանն այլանդակություն է անվանել այդ հուշարձանը: Այս մասին նա հայտարարել է շաբաթ օրը Կարսում: Նա քաղաքապետին, որը Էրդողանի «Արդարություն և զարգացում» կուսակցության անդամ է, կոչ է արել մինչև իր հաջորդ այցը քանդել այն և փոխարենը կառուցել պուրակ: Այս մասին հաղորդել է Anadolu գործակալությունը:
«Նրանք այլանդակություն են տեղադրել… անհնար է պատկերացնել, որ այդպիսի գործերը կարող են տեղ զբաղեցնել արվեստի լուրջ գործերի կողքին»,- ավելացրել է նա:
The Wall Street Journal թերթը եզրակացնում է, որ այս հայտարարություններն ասված են առաջիկա ընտրությունների համար, որոնք կկայանան հունիսին: Էրդողանի այս հայտարարությանն անմիջապես պատասխանեցին ընդդիմադիր ժողովրդահանրապետական կուսակցությունից. «Քանդակը ո՛չ տարօրինակ է, ո՛չ էլ այլանդակ»,- ասել է այդ կուսակցության պատգամավոր և մշակույթի նախկին նախարար Էրջան Կարակասը: Նա այդ հուշարձանը գնահատել է որպես բարձր արվեստի նմուշ և «հակաթույն» Ցեղասպանության հուշարձաններին ու կոչ արել Էրդողանին փոխել իր որոշումը:
Թերթը գրում է, որ 30 մետր բարձրություն ունեցող այս հուշարձանը կառուցվել է 2008 թ. Կարսում` Հայաստանի սահմանից 40 կմ հեռավորության վրա: Այն նախաձեռնվել էր Կարսի քաղաքապետի կողմից, որը ջանքեր էր գործադրում Հայաստանի հետ հարաբերությունների բարելավման ուղղությամբ` հավատալով, որ սահմանի բացումը կօգնի զարգացնելու քաղաքը:
Թերթը նաև հիշեցնում է, որ հուշարձանը հենց սկզբից բուռն վեճերի տեղիք է տվել: Տեղի ազգայնականներն ու քաղաքի՝ մոտ 20% կազմող ադրբեջանական բնակչությունը կոչ էին անում մշակույթի նախարարությանը չթույլատրել այս հուշարձանի կառուցումը: Ի վերջո, հուշարձանի ձեռքերից մեկը չտեղադրվեց և մնաց ներքևում՝ հողի վրա:
Հարցը մտավ փակուղի, իսկ տեղի իշխանությունները սպասում էին Անկարայի ցուցումներին: Թերթը եզրակացնում է, որ «փակուղին հաղթահարվեց», ցուցումներն էլ Անկարայից տեղ հասան: