Հայաստանում կա օրենքի միատեսակ կիրառության հետ կապված խնդիր, և սփյուռքահայն առավել խոցելի է այդ առումով: «Արմենիա Մարիոթ» հյուրանոցում Սփյուռքահայ ներդրողների շահերի պաշտպանության նախաձեռնող խմբի կազմակերպած հեռուստակամուրջ-քննարկմանն այսօր այսպիսի եզրահանգման եկան քննարկման մասնակիցները, իսկ քննարկման արդյունքները հույսեր են արթնացնում, որ Հայաստանում սփյուռքահայ ներդրողների շահերի համատարած ոտնահարման դեպքերի պարագայում Պետական եկամուտների կոմիտեն այսուհետ սկսելու է հաշվի առնել ոչ միայն քննիչների նմանատիպ գործերով իրարից չտարբերվող որոշումները, այլ նաև տուժող կողմի և փաստաբանների ներկայացրած փաստարկները «քցված» սփյուռքահայ ներդրողների գործերի վերաբերյալ:
Այսօր նախաձեռնող խումբը Հայաստանում ներդրումներ կատարած, սակայն հետագայում շահույթ ստանալու փոխարեն թալանված մի քանի սփյուռքահայ ներդրողների դատական գործերի մանրամասներ ներկայացրեց ինչպես լրատվամիջոցներին, այնպես էլ քննարկմանը ներկա պետական ատյանների ներկայացուցիչներին: Ժորժ Թումասյան, Էդմոնդ Խուդյան, Նարեկ Հարթյունյան՝ նրանք այն տասնյակ գործարարներից ընդամենը 3-ն են, ովքեր այսօր բառի բուն իմաստով փաստի առջև են կանգնած:
Քննարկման մասնակից Պետական եկամուտների կոմիտեի նախագահի առաջին տեղակալ Արմեն Ալավերդյանը քննարկման սկզբում թեև փորձեց հնարավորինս արդարացնել թե՛ այս, թե՛ մնացած գործերի մասով Պետեկամուտների կոմիտեի քայլերը, սակայն քննարկման ավարտին խոստացավ անձամբ հետամուտ լինել դրանց ընթացքին` խնդրելով գործին ծանոթ փաստաբաններին անձամբ իրեն տրամադրել սփյուռքահայերի գործերում իրավունքի խախտումների վերաբերյալ տվյալները: Հայաստանում մի շարք սփյուռքահայ ներդրողների կողմից ներդրված միջոցների հափշտակությունների փաստերի բացահայտման ապօրինությունների վերաբերյալ քննարկմանը խոսեց ԱԺ պատգամավոր Ստեփան Սաֆարյանը, իսկ Արա Նռանյանը անդրադարձավ տնտեսության մեջ սփյուռքի պոտենցիալի նպատակային օգտագործման խնդրին:
Նշենք, որ հեռուստակամուրջ քննարկմանը մասնակցում էին նաև Սփյուռքահայ ներդրողների շահերի պաշտպանության նախաձեռնող խմբի անդամներ փաստաբաններ Լեռնիկ Հովհաննիսյանը, Նիկոլայ Բաղդասարյանը և Սամվել Ջաղինյանը, սփյուռքի փոխնախարար Վարդան Մարաշլյանը, իսկ եթերով ԱՄՆ-ից քննարկմանն էին միացել ամերիկահայ տուժած գործարար Էդմոնդ Խուդյանը, մտավորական, նախկին լրագրող Ասյա Ասատրյանը և «Ասպարեզ» թերթի խմբագիր Աբո Պողիկյանը:
