Այսօր «Պոստ Սկրիպտում» մամուլի ակումբ էր հրավիրվել ՕԵԿ փոխնախագահ Մհեր Շահգելդյանը, ով անդրադարձավ այն լուրերին, համաձայն որոնց՝ ՕԵԿ-ում համամասնական ցուցակի վերաբերյալ առկա են տարաձայնություններ, ներկայացրեց նաև, թե ինչպես է ՕԵԿ-ը պատրաստվում ընտրություններին և ինչ ակնկալիքներ ունի:
Նախ՝ ՕԵԿ փոխնախագահը անդրադարձավ այն լուրերին, համաձայն որոնց՝ ՕԵԿ-ում համամասնական ցուցակի վերաբերյալ առկա են տարաձայնություններ, և հավաստիացրեց, որ որևէ խնդիր չի կարող լինել, դա բացառվում է, երբեք ՕԵԿ-ում նման քննարկումներ չեն եղել։ «Իսկ ես և Հեղինե Բիշարյանը ընկերներ ենք»,- նշեց նա` հավելելով, որ գործընկերների միջև տարաձայնությունները բացառվում են:
Մարտի 3-ին կկայանա կուսակցության համագումարը, և այդ օրը շատ հարցեր իրենց պատասխանները կստանան։ Կուսակցությունը 15-20 ընտրատարածքներում մեծամասնական ընտրակարգով թեկնածուների կառաջադրի:
Լրագրողների հարցին՝ մինչև ե՞րբ կգործի կոալիցիան, Մ. Շահգելդյանը պատասխանեց. «Կարևորագույն հարցը` ազնիվ մրցակցության կանոններն են: Կոալիցիան գոյություն է ունենալու այնքան, որքան կշարունակվի քաղաքական ներկա դասավորվածությունը»:
«ՕԵԿ-ը միանշանակ կլինի ապագա խորհրդարանում, և կարծում եմ, որ կկարողանանք ընդլայնել մեր ներկայությունը»,- նկատեց ՕԵԿ փոխնախագահը:
«ՕԵԿ համամասնական ցուցակը առայժմ քննարկման փուլում է»,- նշեց նա` անդրադառնալով այն հայտարարությանը, թե ՕԵԿ ցուցակի առաջին երեք տեղերում կլինեն Արթուր Բաղդասարյանը, Արմեն Երիցյանը, Հեղինե Բիշարյանը՝ ըստ էության նաև չհերքելով այս տեղեկությունը:
ՕԵԿ փոխնախագահը անդրադարձավ մամուլում ՕԵԿ-ի հասցեին հնչող քննադատությանը և նշեց՝ դա սև PR է, ինչը ապացուցում է, որ մամուլի այն պնդումները, թե ՕԵԿ-ը չի լինի ապագա խորհրդարանում, ճիշտ չեն, հակառակ դեպքում նման լայնածավալ աշխատանք չէր կատարվի:
