Բրիտանական դատարանը քննել է 19 ժամ ղեկին անցկացրած և ոստիկանության կողմից, ի վերջո, կանգնեցված թոշակառու Մորին Դարվելի գործը: Միջադեպը տեղի է ունեցել դեռ 2011 թ. սեպտեմբերին, սակայն դատարանը 83-ամյա թոշակառուի գործի քննությունը անցկացրել է միայն այսօր, տեղեկացնում է Kent Online-ը:
Ինչպես հետևում է գործից` 2011 թ. սեպտեմբերի 8-ի առավոտյան Դարվելը, ունենալով 50 տարվա վարորդական փորձ, դուրս է եկել Էշֆորդ քաղաքից և ուղևորվել Բրիստոլ, որտեղ պետք է մասնակցեր հարազատներից մեկի պսակադրությանը: Ճանապարհին թոշակառուն շփոթել է շրջադարձը, բայց դրան առանձնակի ուշադրություն չի դարձրել:
Կնոջ խոսքերով` ինքը հասկացել է, որ սխալվել է, սակայն հետ չի դարձել` փորձելով այլ ճանապարհ գտնել դեպի Բրիստոլ: Այնուհետև նա որոշել է կանգ առնել սուրճ խմելու: Իսկ երբ վերստին ճանապարհ է ընկել, ժամը արդեն հաջորդ օրվա առավոտյան 5:30-ն է եղել:
Թոշակառուն հասցրել է մի քանի կիլոմետր անցնել, երբ ոստիկանությունը նրան կանգնեցրել է: Իրավապահների հետ զրուցելիս թոշակառուն ասել է, որ ինքն ամենևին չի մոլորվել և շարունակել է ճանապարհը` նոր շրջադարձ գտնելու հույսով:
Մորին Դարվելը, փաստորեն, 288 կմ-ի փոխարեն 19 ժամում անցել է մոտ 700 կմ:
Դատարանը նրան 15 ամսով զրկել է վարորդական իրավունքից և տուգանել 100 ֆունտ սթեռլինգով: