Ադրբեջանական APA լրատվական գործակալության փոխանցմամբ՝ փետրվարի 27-ին ԵՄ արտաքին հարցերով խորհուրդը Բրյուսելում քննարկելու է Հարավային Կովկասում տիրող իրավիճակը:
Ակնկալվում է, որ ԵՄ խորհուրդն այդ ժամանակ հերթական անգամ հաստատելու է իր աջակցությունը Հարավային Կովկասում մարդու իրավունքների պաշտպանությանը, ժողովրդավարությանն ու օրենքի գերակայությանը, անվտանգությանն ու բարգավաճմանը:
Բացի այդ, կարևորվելու է տարածաշրջանում առկա հակամարտությունների խաղաղ կարգավորման ուղիների փնտրտուքը: Քննարկվելու են նաև «Արևելյան գործընկերություն» ծրագրի շրջանակներում առաջիկա քայլերը: Այդ ծրագրում ընդգրկված են Հայաստանը, Վրաստանն ու Ադրբեջանը:
Ինչ վերաբերում է ազատ առևտրի համաձայնագրի կնքման բանակցություններին, ապա նշված է, որ Վրաստանի հետ դրանք արդեն իսկ մեկնարկել են, Հայաստանի հետ դրանք կմեկնարկեն այս տարվա առաջին կեսին, իսկ Ադրբեջանի հետ նախատեսված չեն նմանատիպ բանակցություններ, քանի որ նա Առևտրի համաշխարհային կազմակերպության (ԱՀԿ) անդամ չէ:
