14 տարի անց տեղի ունեցավ սպասված փոփոխությունը՝ Պետական եկամուտների կոմիտեն վերացնում է հասույթի գրանցման և ապրանքների մատակարարման գրքերը: Այսօր կառավարության նիստում ուժը կորցրած ճանաչվեց 1997 թ. «ՀՀ տարածքում առաքվող կամ տրամադրվող, կամ տեղափոխվող արտադրանքի, ապրանքների գրանցման (հաշվառման) մասին» որոշումը:
«Հասույթի գրանցման և ապրանքների մատակարարման գրքերը հանվում են շրջանառությունից: Սա մեծ և սպասված փոփոխություն է»,- ասաց ՊԵԿ նախագահ Գագիկ Խաչատրյանը` նշելով, որ գործարարները ստիպված էին գրքեր լրացնել 20 սյունակներով, և ամեն մի սխալը անհետևանք չէր մնում:
Այս գրանցամատյանների վերացումը կատարվում է էլեկտրոնային եղանակի անցնելու շնորհիվ: «Այն կնպաստի բիզնես-միջավայրի առողջացմանն ու թեթևացմանը»,-վստահեցրեց Գ. Խաչատրյանը:
Վարչապետ Տիգրան Սարգսյանի խոսքով՝ սա երկար սպասված որոշում է, և գործարարները դրական կերպով կարձագանքեն դրան:
