Հայ օգնության ֆոնդի «Երեխաների ընդունման և կողմնորոշման կենտրոնը» բացասական ուղի բռնած երեխաների թվի նվազում թեև գրանցում է, սակայն ոչ էական: Կենտրոնի տնօրեն Ռամոնա Կտակյանի համոզմամբ` մարմնավաճառությամբ զբաղվող երեխաների թիվն էլ այսօր ավելի քիչ է, քան նախկինում, բայց նրանք դեռ կան: «Ոստիկանությունը ժամանակ առ ժամանակ հավաքում է նրանց, բերում մեզ մոտ, փորձում ենք նրանց հետը զրուցել, հասկանալ պատճառները, բացատրել, եթե կա ծնող, փորձում ենք նրան աշխատանքով ապահովել»,- ասում է կենտրոնի տնօրենը: Սակայն Ռամոնա Կտակյանն իր տարիների փորձով համոզվել է, որ հաճախ հատկապես ծնողներն են ընդդիմանում, որովհետև երեխան աշխատելով ավելի շատ է վաստակում, քան իրենք: «Այստեղ արդեն ինքնասիրության հարց է: Երեխայի հետ, հավատացեք, ավելի հեշտ է: Երբեմն այս երեխաներն աշխատում են ուղղակի ծնողի պարտքի դիմաց»,- ասում է կենտրոնի տնօրենը: