Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այսօր շարունակված ՀԱԿ ակտիվիստների դատավարության գործով տուժող ճանաչված Հայկ Նաջարյանը մոռացել էր նախորդ դատական նիստի ժամանակ տված ցուցմունքները:
Մասնավորապես՝ «տուժողը» դատարանին սկսեց վստահեցնել, որ ամբաստանյալ Տիգրան Առաքելյանը հենց իրեն է հայհոյել, ընդ որում՝ իր նախորդ ցուցմունքում նշած բառերին, որոնցով, իր խոսքով, իրեն դիմել էր ՀԱԿ ակտիվիստը, Հայկ Նաջարյանը ևս մի քանի բառ ավելացրեց, որոնք երևի հիշողության փայլատակման արդյունքում մտաբերեց:
Ի դեպ, Նաջարյանը դատարանում նշեց, որ դեպքի օրն իրեն քաշքշած և ճանկռած աղջիկներից է եղել նաև «Հայկական ժամանակ» օրաթերթի լրագրող Անի Գևորգյանը. Նա, ի դեպ, ակտիվիստներից Սարգիս Գևորգյանի քույրն է:
Հիշեցնենք, որ Հայ ազգային կոնգրեսի 7 երիտասարդ ակտիվիստներ՝ Տիգրան Առաքելյանը, Սարգիս Գևորգյանը, Դավիթ Քիրամիջյանը և Արտակ Կարապետյանը օգոստոսի 9-ին բերման էին ենթարկվել Երևանի Կարապի լճի հարակից տարածքում ոստիկանության աշխատակիցների հետ տեղի ունեցած միջադեպի հետևանքով: Բոլորը ձերբակալվել էին: Սահակ Մուրադյանը, Դավիթ Քիրամիջյանը, Արտակ Կարապետյանը, Սարգիս Գևորգյանը, Արեգ Գևորգյանը և Վահագն Գևորգյանը հետագայում ազատ էին արձակվել` հանրապետությունից չբացակայելու ստորագրությամբ: Իսկ Տիգրան Առաքելյանը մինչ օրս պահվում է կալանքի տակ:
