Իրանում բուհական համակարգի բարեփոխումների արդյունքում հայտարարվել է, որ 12 բուհական դիսցիպլին չեն համապատասխանում եւ համատեղելի չեն իսլամի նորմերին: Դրանց շարքում են իրավաբանությունը, փիլիսոփայությունը, մենեջմենթը, հոգեբանությունը, քաղաքագիտությունը, ինչպես նաեւ քաղաքացիական իրավունքը եւ գենդերային հետազոտությունները: Ինչպես հաղորդում է newsru.co.il կայքը, Իրանի կրթության գերատեսչության ղեկավար Աբդալֆազլ Հասանին հայտարարել է, որ համալսարաններին այսուհետ կարգելվի այս դիսցիպլինների շրջանակում նոր առարկաներ բացել, իսկ հին դասագրքերի գրեթե 70%-ն առաջիկա տարիների ընթացքում կվերամշակվեմ:
Կայքը նաեւ հիշեցնում է, որ Իրանի ուսանողներից գրեթե 3.5 մլն-ն ուսանում է հումանիտար առարկաներ, եւ որ հենց այդ ուսանողներն են անցած տարի ակտիվ մասնակցություն ունեցել նախագահական ընտրությունների կեղծման դեմ բողոքի ակցիաներին: Անցած տարի Իրանի առաջնորդ այաթոլա Ալի Համենեին հայտարարել էր, որ տվյալ առարկաների ուսումնասիրության ընթացքում կասկածներ կարող են առաջանալ կրոնի ճշմարտացիության վերաբերյալ, եւ որ այդ առարկաները պետք է լրամշակվեն եւ համապատասխանեցվեն կրոնին:
