Այս արտահայտության հեղինակը Հայաստանի ըմբշամարտի բազմակի չեմպիոն Տիգրան Կեսոյանն է (գերծանր` 120 կգ քաշային կարգ): Հայտնի չէ` Կեսոյանը մրցասպարե՞զն է շփոթել, թե՞ մարդկանց սեռերը մանկուց չի տարբերել:
Կեսոյանի ընկերը` Լևոն Զարոյանը, մեծ սխալ է թույլ տվել իր ընկերուհու ծննդյան տոնին նրան հրավիրելով. «Ուրարտու» ռեստորանը վերածվել է ուրարտական ռազմադաշտի: Բայց ամեն ինչ սկսենք սկզբից։
Անժելա Հովհաննիսյանը մի օր որոշում է իր ծննդյան տարեդարձը «Ուրարտու» ռեստորանում նշել: Այդ միջոցառմանը ներկա գտնվելու համար հրավիրում է իր ընկերոջը` Լևոն Զարոյանին, նրա ընկերոջը` Տիգրան Կեսոյանին, իր մորաքրոջ որդիներ՝ գործով տուժողներ Մացակ և Արամ Պողոսյաններին, նրանց ընկեր Նարեկ Հարությունյանին, իր հորաքրոջ աղջիկ Աիդային, ընկերուհիներ Թեհմինե Մելքոնյանին և Սուսաննա Օհանյանին։ 2011թ.-ի ապրիլի 4-ին նրանք ուրախ տրամադրությամբ սկսում են ծննդյան արարողությունը, որի ընթացքում գալիս են Լևոնն ու Տիգրանը: Նրանք էլ միանում են կենաց ասողներին, և օղու երկրորդ բաժակից հետո 21-ամյա Տիգրան Կեսոյանը դառնում է անվերահսկելի և ամեն ինչ խառնում իրար. ժամը 22.30-ի սահմաններում, երբ հավաքվածները սեղանի շուրջ շարունակել են խնջույքը, Տիգրան Կեսոյանը հեռախոսով խոսելիս բարձրաձայն հայհոյանքներ է հնչեցրել: Եվ քանի որ չեմպիոնը դա շարունակաբար է արել, սեղանակիցներից հոբելյարի ընկերուհին` Թեհմինե Մելքոնյանը, նրան դիտողություն է արել և խնդրել սեղանի շուրջը և հատկապես երեխայի ներկայությամբ չհայհոյել։
Սակայն նկատողությունը Կեսոյանին բացարձակ դուր չի եկել, և նա սկզբում ասել է` «խի՞, դուրդ չեկա՞վ», և երբ հաստատող պատասխան է ստացել, շրջվել է ու բղավելով՝ Թեհմինեին դիմել` «արա, դու գիտե՞ս՝ ես ով եմ, տեղը չես բերո՞ւմ»։ Անհարմար վիճակ է ստեղծվել, և հոբելյարի մորաքրոջ տղան` Մացակ Պողոսյանը, սխալվել ու հայացքը հառել է չեմպիոնի վրա: Քանի որ Մացակի հայացքը չեմպիոնին մեծարելու տարրեր չի պարունակել, Տիգրանը հարցրել է` «հը, արա, դո՞ւ խի ես նայում», ու դա առիթ դարձրել, որ Մացակին դուրս հրավիրի` «հաշիվ մաքրելու»: Ռեստորանի 2-րդ հարկի այցելուների խնջույքը հարամ է եղել. Մացակն ու Տիգրանը միասին գնացել են դեպի դահլիճի մուտքի դուռը, սակայն հենց հասել են պարահրապարակ, Կեսոյանը կոպիտ կերպով խախտել է հասարակական կարգը, խանգարել ռեստորանի հաճախորդների հանգիստը, ռեստորանի աշխատակիցների բնականոն աշխատանքը և նրանց ներկայությամբ քաշքշել է Մացակ Պողոսյանին` պատռելով շապիկը, բռնություն գործադրելով վերջինիս նկատմամբ` վայր է գցել նրան:
Հետո դիտավորությամբ ձեռքերով և ոտքերով հարվածել է նրա մարմնի տարբեր մասերին և պատճառել մարմնական վնասվածքներ` գլխի, վերին վերջույթների շրջանների քերծվածքների, արյունազեղման, աջ դաստակի շրջանի ենթամաշկային արյունահավաքի, առաջին մատի սալջարդի ձևով, որոնք տուժողի առողջությանը պատճառել են թեթև վնաս` առողջության կարճատև քայքայումով։ Նրա ագրեսիվ գործողությունները փորձել են կանխել, սակայն գերծանր քաշային չեմպիոնը դիմադրություն է ցույց տվել իր գործողությունները խափանող Արամ Պողոսյանին և հարվածելով՝ մարմնական վնասվածքներ հասցրել վերջինիս դեմքի, վերին և ստորին վերջույթների շրջաններում: Ի վերջո, վեճը հարթվել է «Ուրարտու» ռեստորանի աշխատակիցների և մյուս հաճախորդների միջամտությամբ, և հաջողվել է չեմպիոնին դուրս հանել ռեստորանից:
Քրեական գործ է հարուցվել խուլիգանության փաստով (քր. օր.-ի 258-րդ հոդվածի 3-րդ մասի 2-րդ կետ), որը նախատեսում է տուգանք` նվազագույն աշխատավարձի երկուհարյուրապատիկից հինգհարյուրապատիկի չափով, կամ ազատազրկում` առավելագույնը հինգ տարի ժամկետով:
Կենտրոն և Նորք-Մարաշ վարչական շրջանների ընդհանուր իրավասության դատարանը` նախագահությամբ Մնացական Մարտիրոսյանի, անցյալ տարվա նոյեմբերի 2-ի դատավճռով ամբաստանյալ Տիգրան Սամվելի Կեսոյանին դատապարտել է 2 տարվա ազատազրկման և համաներում կիրառելով` նրան ազատել պատժի կրումից: Իսկ նրա նկատմամբ ընտրված խափանման միջոցը՝ չհեռանալու մասին ստորագրությունը, վերացվել է։
Ամբաստանյալն, իհարկե, չի ընդունել մեղքը, սակայն դատարանը պատիժ սահմանելիս ոչ թե դա է հաշվի առել, այլ այն, որ Տիգրան Կեսոյանը նախկինում դատված չի եղել, բնութագրվում է դրական, իսկ որպես նրա պատասխանատվությունը և պատիժը ծանրացնող հանգամանք դատարանը հաշվի է առել հանցանքն ալկոհոլի ազդեցության տակ կատարելը։
Սակայն նույնիսկ այդ պատիժն է չեմպիոնի համար խիստ եղել, և նա դատական երկրորդ ատյան վերաքննիչ բողոք է ներկայացրել և պահանջում է բեկանել դատավճիռը ու կայացնել արդարացման դատավճիռ կամ մեղմացնել նշանակված պատիժը:
Հ. Գ. Անկախ նրանից, թե վերջնական ինչ տեսք կստանա դատական ակտը, Տիգրանին խորհուրդ կտանք` ծնունդ չգնալ (հատկապես աղջիկների) ու չխմել նույնիսկ երկու բաժակ. եթե դա ազդում է 120 կգ-անոց քաշին, ուրեմն վնաս է մարզական կարիերային:
