Թուրքմենստանում փետրվարի 12-ին անցկացված ընտրությունները արդար և ազատ չէին: Այս մասին երեկ հայտարարել են ԱՄՆ պետքարտուղարությունում: «Նախընտրական պայմանները, որին հատկապես ուշադրություն էր դարձրել ԵԱՀԿ-ն, այդ թվում` «հիմնարար ազատությունների սահմանափակումները» և «քաղաքական այլընտրանքների միջև սահմանափակման ընտրությունը» բացառել են իրական ազատ և արդար ընտրությունների անցկացումը: ԵԱՀԿ-ի և ՄԱԿ-ի որոշումները` դիտորդներ չուղարկել այդ ընտրություններին, պայմանավորված են եղել սրանով»,- ասել են պետքարտուղարությունում:
Նշվում է նաև, որ պետքարտուղարությունում ցանկանում են առաջընթաց տեսնել նոր ընդունված «կուսակցությունների գրանցման» օրենքի շրջանակում: Առաջընթացն, ըստ ամերիկացիների, պետք է նկատելի լինի հաջորդ տարի Թուրքմենստանում անցկացվելիք խորհրդարանական ընտրությունների ժամանակ:
Հիշեցնենք, որ փետրվարի 12-ի նախագահական ընտրություններում հաղթել էր Գուրբագուլի Բերդիմուխամեդովը, որը հավաքել էր քվեների 97,14%-ը: