Ժողովրդական կուսակցության երեկվա հանրահավաքը ամենևին էլ ի պաշտպանություն ԱԼՄ-ի չէր: Կուսակցության և «ԱԼՄ հոլդինգի» նախագահ Տիգրան Կարապետյանի խոսքերով, իրենք պարզապես ուզում էին ցույց տալ, որ Ժողովրդական կուսակցությունն ունի կուսակցականներ և ունի ժողովրդի կողմից աջակցություն: Կարապետյանը տեղեկացրեց, որ առաջին հանրահավաքը միայնակ են արել, իսկ հաջորդ հանրահավաքներին այլ ուժերի մասնակցությունը կողջունեն. «Մյուս հանրահավաքներին թող գան, որովհետև եթե մենք առաջին հանրահավաքին հրավիրեինք քաղաքական ուժերի, ոչ մեկը չէր հասկանա, թե ում ուժերն են հավաքվել»:
Կարապետյանը հունվարի 19-ի երևանյան հանրահավաքին հրավիրեց մասնակցելու բոլոր քաղաքական ուժերին: Բայց, ըստ նրա, այն քաղաքական ուժերը, որոնք «լիդերով» են պայմանավորված չեն գա. «Ոնց կլինի լիդերները հանդուրժեն գան կանգնեն: Դա է մեր ցավը, որ մեր լիդերները թևավոր են»:
Տիգրան Կարապետյանը տեղեկացրեց, որ իրենք մտածում են քաղաքական ուժերին իրենց միանալու համար առաջարկներ ներկայացնելու ձևը. «Ես մենակ չեմ որոշում, կուսակցությունն է որոշում, և էս երկու օրվա ընթացքում կորոշենք դիմելու ձևը: Մենք չենք մտածում, որ պետք է մենակ պայքարենք` բոլոր առողջ ուժերը պետք է միասին պայքարեն: Այդ պայքարը պետք է բերի քաղաքացիական հասարակության ձևավորմանը, իսկ այդ հասարակությունը չի կարող միայն մեկ ուժ ձևավորել»:
Տիգրան Կարապետյանի բնորոշմամբ, դաշտում գործող առողջ ուժերը բոլոր այն կուսակցություններն են, որոնք չեն ուզում հանդուրժել այն իրականությունը, որը հնարավորություն է տալիս հազար հոգու բարգավաճել, իսկ մնացածը մնան ճնշված վիճակում: Այդպիսի ուժերը, ըստ Տիգրան Կարապետյանի, այսօր ՀԱԿ-ն է, Ժիրայր Սեֆիլյանի նախաձեռնությունը:
