Ինչպես փոխանցում է պարբերականի կայքը, Թուրքիայի վարչապետ Ռեջեփ Թայիփ Էրդողանը երեկ Էրզրումում հանդիպել է Թուրքիայի դիվանագիտական կորպուսի ներկայացուցիչների հետ:
«Առաջին լրատվականը» երեկ տեղեկացրել էր, որ Հունաստանի վարչապետ Գեորգիոս Պապանդրեուն և Թուրքիայի վարչապետ Էրդողանը երեկ հանդիպել են Էրզրումում` քննարկելու համար երկկողմ հարաբերությունների խնդիրները: Էրդողանը շնորհակալություն է հայտնել Պապանդրեուին` դիվանագետների հետ հանդիպմանը նույնպես ներկա գտնվելու համար:
Էրդողանը խոսել է թուրքական դիվանագիտության մի շարք առանցքային խնդիրների մասին` տնտեսական ճգնաժամ, հարևանների հետ հարաբերություններ, Թուրքիայի անդամակցությունը Եվրամիությանը:
«Կրթությունը, գիտությունը, հզոր տնտեսությունը և արտաքին քաղաքականությունը, ինչպես նաև խաղաղությունը, կարգապահությունն ու կայունությունը մեծ նշանակություն են ձեռք բերել 21-րդ դարում: Տասնամյակներ շարունակ մենք ստիպված էինք զարգացնել մեր քաղաքականությունները (տարբեր ոլորտներում.- 1in.am)` հաշվի առնելով մեր ներքին և արտաքին թշնամիներին: Հիմա այդ հասկացությունները հնացել են: Մենք պետք է հասկանանք նոր դարաշրջանի դինամիկան և չափանիշները` ռազմավարությունը զարգացնելով դրան համապատասխան»,- ասել է Թուրքիայի վարչապետը:
Էրդողանն անդրադարձել է ԱՄՆ-ից սկսված և ամբողջ աշխարհում տարածված տնտեսական ճգնաժամին` միաժամանակ շեշտելով, որ վերջին տասնամյակի ընթացքում Թուրքիայի տնտեսությունը մեծ առաջընթաց է ապրել: «Մեր ակտիվ և տեսանելի արտաքին քաղաքականությունը և «զրո խնդիրների քաղաքականությունը» հարևանների հետ թույլ են տվել ուժեղացնել մեր տնտեսությունը: Որպես արդյունք Թուրքիայի տնտեսությունը դարձավ աշխարհի 17-րդ խոշորագույն տնտեսությունը»,- ավելացրել է նա:
Էրդողանը նաև անդրադարձել է ԵՄ-Թուրքիա հարաբերություններին: «Թուրքիան արժանացել է անարդար վերաբերմունքի ԵՄ անդամակցության գործընթացում: Մենք Միության անդամ դառնալու մեր առաջին քայլը կատարել ենք 1959թ.-ին, այնուհետև պաշտոնապես դիմել ենք 1963թ.: 50 տարի շարունակ ԵՄ 27 անդամներ անընդհատ փորձել են վրդովեցնել Թուրքիային: Թուրքիան մասնակցում էր ԵՄ գագաթնաժողովներին մինչև 2004թ.: Այդ ժամանակ ԵՄ-ն որոշեց չհրավիրել Թուրքիային գագաթնաժողովների: Սա հերթական սխալ վերաբերմունքի դրսևորում է Թուրքիայի նկատմամբ: Եթե երկրներն իրենց ջանքերը կենտրոնացնեն անհամաձայնությունները, հակասությունները և խնդիրները վառ պահելու վրա, ապա նրանք չեն կարող խոսել արտաքին առևտրի, ներմուծման, զբոսաշրջության և գլոբալիզացիայի մասին: Թուրքիան 50 տարի շարունակ ցուցաբերել է համբերություն: Եթե ԵՄ-ն չի ցանկանում, որպեսզի Թուրքիան ստանա լիակատար անդամակցություն, մենք պետք է հայտարարենք, որ մեր համբերությունն էլ սահմաններ ունի»,- նշել է նա:
