«Հանրահավաքը ԱԼՄ-ի հետ կապված չէ` այն առումով, որ մենք քաղաքական միավոր ենք, և մենք տասը տարի քաղաքական դաշտում ենք, և մենք ուղղակի, փաստորեն, դառնալու ենք ընդդիմություն: Եթե մենք կենտրոնամետ էինք ու որոշակիորեն պահում էինք խաղի կանոնները, և եթե մեր հանդեպ խաղի կանոնները խախտում են, ուրեմն մեզ մղում են դեպի ընդդիմություն` ասելու, որ չկա ոչ մի կանոն: Եթե չկա ոչ մի կանոն, ուրեմն մենք չենք կարող ընդունել այդ իրողությունը, այդ ձևավորումը, և մեր դրսևորումը բերելու է ավելի վճռական քայլերի»,- երեկ կայացած հանրահավաքի իրական պատճառի մասին «Առաջին լրատվականի» հետ զրույցում ասաց Ժողովրդական կուսակցության և «ԱԼՄ հոլդինգի» նախագահ Տիգրան Կարապետյանը:
Կարապետյանի խոսքերով, միայն ԱԼՄ-ին եթերազրկելու պատճառով չէ, որ իրենք կենտրոնամետ ուժից դարձել են ընդդիմություն. «Վերջին գործընթացները` «Ա1+»-ը փակելը, ինչո՞ւ պետք է «Ա1+»-ը նորից չվերականգնեն, այստեղ արդեն մենք տեսնում ենք ոչ միայն ԱԼՄ-ի խնդիրը, այլ ընդհանուր անարդարություն կա»:
Տիգրան Կարապետյանը նշեց, որ իրենց պայքարի կոչն ուղղված է հենց ընդհանուր անարդարության դեմ պայքարելուն և ոչ թե միայն ԱԼՄ-ի հետ կապված անարդարության դեմ պայքարին: Ըստ Կարապետյանի` ժողովուրդը շատ լավ հասկացել է իրենց կոչը, և դրա ապացույցն այն է, որ հանրահավաքին մոտ 10 հազար մարդ էր եկել. «Անարդարությունը դառնում է ավանդույթ, անարդարությունը դառնում է իշխանավորի խասիաթը: Մենք անարդարության դեմ ընդհանուր ենք պայքարելու ու դա կապ չունի զրկել են, չեն զրկել»:
Տիգրան Կարապետյանը տեղեկացրեց, որ իրենց հանրահավաքների շարքը շարունակվելու է, և հաջորդը լինելու է Վանաձորում, այնուհետև Հրազդանում, Երևանում և միշտ ժամը երեքին: «Մարդկանց հարմար է, մենք հարմարվում ենք իրենց խնդրանքով»,- ասաց Տ. Կարապետյանը: