Փենսիլվանիայի նախկին սենատորի` Ռիկ Սանտորումի հայտարարությունն այն մասին, որ Նիդերլանդներում անցկացվում է զանգվածային ստիպողական էվթանազիա, քննադատաբար է ընդունվել: Այդ մասին տեղեկացնում է BuzzFeed:
Այսպես, NRC Handelsblad թերթը փետրվարի 18-ին գրել էր, որ Սանտորումի հայտարարության վրա կարելի է ծիծաղել, եթե նա չպայքարեր աշխարհի ամենահզոր երկրներից մեկում նախագահի թեկնածու դառնալու համար:
Նիդերլանդների Radio 1-ը Սանտորումի հայտարարությունը համարել է «փաստերի վրա չհիմնվող քաղաքականություն»: Նման քննադատական մեկնաբանություններ հայտնվել են այլ ԶԼՄ-ներում նույնպես: Այդ հրապարակումներում ասվել է, որ 2002 թ. Նիդերլանդներում էվթանազիայի թույլատվությունից հետո այդպես է մահանում մարդկանց 2-3.2 տոկոսը:
Համաձայն գործող օրենքի` այն կարող է իրականացվել միայն հիվանդի խնդրանքով` մի շարք ընթացակարգերի հետևելով:
Իր հայացքները, կապված էվթանազիայի հետ, Սանտորումը հայտնել է հարցազրույցի ժամանակ փետրվարին: Նրա խոսքերով` էվթանազիան կազմում է մահացությունների 10 տոկոսը, ընդ որում, էվթանազիայի մեծ մասը կատարվում է բռնի կերպով` տարեց հիվանդների տարիքի և հիվանդությունների պատճառով: «Այնպես որ, տարեց մարդիկ Նիդերլանդներում չեն դիմում հիվանդանոց,- ասել է Սանտորումը,- նրանք մեկնում են այլ երկիր»: Նա նաև պատմել է, որ Նիդերլանդներում տարեց մարդիկ թևնոցներ են կրում, որոնց վրա գրված է. «Իմ հանդեպ էվթանազիա չկիրառեք»: