Ադրբեջանի իշխանությունը սահմանադրական փոփոխությունների հետ կապված օրենքի նախագիծ է պատրաստում, որն ուղղված է «նախագահի դեմ միջազգային ճնշումների կանխմանը»: Ինչպես տեղեկացրել է «Ենի Մուսավաթ» թերթը, օրենքի նախագիծը պատրաստում է «Մայր Հայրենիք» կուսակցության նախագահ, պատգամավոր Ֆազայիլ Աղամալը: Վերջինիս խոսքով, նոր օրենքը թույլ կտա միջազգային ճնշումներից պաշտպանել Ադրբեջանի նախագահ Իլհամ Ալիևին:
Ֆ.Աղամալը գտնում է, որ անցյալ տարվանից Ադրբեջանի իշխանության նկատմամբ ճնշումներն աճել են: The Washington Post թերթում Ի.Ալիևի` Դուբայում ունեցած տասնյակ միլիոնավոր դոլար արժողությամբ անշարժ գույքի մասին հրապարակումներից հետո թուրք դիվանագետ Թ.Էրի և Եվրոպայի խորհրդի Ադրբեջանի գծով նախկին համազեկուցող Անդերս Հերկելի` Ադրբեջանի մասին գրած գրքերը մեծ աղմուկ են առաջացրել այդ երկրում: Ադրբեջանի իշխանության ներկայացուցիչները նույնիսկ աշխատել են քայլեր ձեռնարկել Թ.Էրին դատի տալու ուղղությամբ: Նրանք հայտարարել են, որ Թ.Էրը պետք է ձերբակալվի` Ի.Ալիևի պատիվն ու արժանապատվությունը «վիրավորելու» համար, սակայն իրավական բավարար բազայի բացակայության պատճառով գործն ավարտին չի հասցվել:
Մեկնաբանելով միջազգային ճնշումներից պաշտպանելու համար օրենք ունենալու անհրաժեշտությունը` փաստաբան Ֆուադ Աղաևը թերթի հետ զրույցում նշել է, որ եթե Ադրբեջանը նման փաստաթուղթ ընդունի, ապա քննադատության կենթարկվի դեմոկրատական երկրների կողմից: «Ադրբեջանը կարող է ընդունել միմիայն իր տարածքում գործող օրենք, որը չի կարող տարածվել ադրբեջանական իշխանությանը քննադատող օտար երկրի քաղաքացու վրա»,- նկատել է փաստաբանը: