Փետրվարի 11-ին մահացած լեգենդար երգչուհի Ուիթնի Հյուսթոնին բուժած բժիշկների դեմ մոտ ժամանակներս կարող են քրեական գործ հարուցել: Այս մասին հաղորդում է NY Daily News թերթը:
Թերթի հաղորդմամբ՝ ոստիկանությունը սկսել է ստուգել երգչուհու հետ աշխատած բժիշկներին և այն դեղատները, որտեղից Հյուսթոնը դեղեր է գնել: Հնարավոր է, որ այդ դեղամիջոցներն անօրինական կերպով են վաճառվել երգչուհուն, չի բացառվում, որ բժիշկները սխալմամբ նրան մեծ չափաբաժնով հակադեպրեսանտներ են նշանակել: Դատական փորձագետները կարծում են, որ Ուիթնի Հյուսթոնին սպանել է հայտնի «մահացու կոկտեյլը», որը բաղկացած է ալկոհոլից և հակադեպրեսանտներից, և որից մահացել են այնպիսի աստղեր, ինչպես Էլվիս Փրեսլին, Էմի Ուայնհաուսը, Հիթ Լեջերը, Մայքլ Ջեքսոնը:
ԶԼՄ-ները հիշեցնում են, որ «սատանայական կոկտեյլից» մահացած Մայքլ Ջեքսոնի բժիշկը մեղավոր է ճանաչվել երգչին պրոպոֆիլի մեծ չափաբաժին նշանակելու մեջ: