«Հետք»-ի էլեկտրոնային պարբերականի խմբագիրը «Արայ» խանութների ցանցի սեփականատիրոջ ինքնասպանության գործով հարցաքննվում է: Այս մասին հայտնում է «Հետք» էլեկտրոնային պարբերականը: Այս պահին նշյալ հանգամանքների շուրջ որպես վկա հարցաքննվում է նաև «Հետքի» խմբագիր Էդիկ Բաղդասարյանը: Իսկ ՀՀ գլխավոր դատախազի մամուլի քարտուղար Սոնա Տռուզյանն էլ «Հետքին» տեղեկացրել է, որ գլխավոր դատախազության մարդու դեմ ուղղված հանցագործությունների գործերով վարչությունն արդեն իսկ հանձնարարել է նախաքննական մարմնին՝ ոստիկանությանը, քննության առարկա դարձնել նշված հրապարակումը:
«Այսինքն՝ նաև այս վարկածի շուրջ կտարվի քննություն, կնշանակվեն փորձաքննություններ, կհարցաքննվեն մատնանշված անձինք»,- նշել է գլխավոր դատախազի մամուլի քարտուղարը:
Հիշեցնենք, որ երկու օր առաջ պարբերականը տպագրել էր մի հոդված և հրապարակել Արմեն Պետրոսյանի քրոջ «Հետքին» տված տեսագրությունը: Հենց նույն օրը՝ փետրվարի 18-ին, Արմեն Պետրոսյանի «ինքնասպանության» գործով զբաղվող քննչական խումբն այցելել է նրա քրոջը` Արմինե Պետրոսյանին, նրանից վերցրել բացատրություններ և նշյալ տեսագրությունը պարունակող խտասկավառակը: