Վրացի ոստիկանին հեռացրել են Facebook-ի շնորհիվ

07 Հունվար, 2011 20:28

Դիտումներ՝ *

Վրաստանի ՆԳՆ աշխատակիցը հեռացվել է աշխատանքից ոստիկանության էթիկայի օրենսգիրքը խախտելու համար, քանի որ խոչընդոտել է Թբիլիսիի կենտրոնում` «Հերոսների հրապարակում», տեղի ունեցած վետերանների ակցիային:
Վետերանների մի խումբ, որոնք 1992-1993 թթ. և 2008թ. օգոստոսին տեղի ունեցած ռազմական գործողությունների մասնակիցներ են, մեղադրել են իշխանություններին իրենց և իրենց ընտանիքների ծանր սոցիալական վիճակին ուշադրություն չդարձնելու մեջ և դեկտեմբերի 27-ին հացադուլ են սկսել վերոնշյալ հրապարակում: Նրանք ցանկանում էին դադարեցնել հացադուլը հունվարի 6-ին, սակայն հունվարի 3-ին ոստիկանությունը ցրել է նրանց: 11 մարդ ձերբակալվել է և տուգանվել խուլիգանության և ոստիկանության օրինական պահանջները չկատարելու մեջ:
Ինչպես հայտնում է վրացական ընդդիմությունը, ակցիայի ցրելու ժամանակ վերոնշյալ սպան` Գվետենաձեն, որը քաղաքացիական հագուտով էր, վիրավորել է հացադուլավորներից մեկի կնոջը` Էկե Մատիաշվիլիին, որը «Վրացական կուսակցություն» ընդդիմադիր միության տարածքային կառույցի ղեկավարն է: Բացի այդ, կուսակցության ներկայացուցիչները նշում են, որ քաղաքացիական հագուստով անհայտ անձինք ծեծի են ենթարկել կուսակցության երիտթևի ներկայացուցչին, որին հետո ձերբակալել են ու տուգանել: «Վրացական կուսակցությունը» դիմել է գլխավոր դատախազին այս միջադեպը քննելու համար: Բողոքի հետ մեկտեղ կուսակցությունը ներկայացրել է նաև տեսաժապավեններ:
ՆԳՆ-ի հեռացված աշխատակցի գործողությունները նկարահանվել էին անկախ հեռուստաալիքների ներկայացուցիչների կողմից և ներկաների ֆոտոխցիկներով: Դրանից հետո ընդդիմության ներկայացուցիչները տեղադրել են նրա նկարը Facebook սոցիալական կայքում, որի միջոցով էլ նրան հայտնաբերել են: