ՀՀ Ընտրական օրենսգրքի 138-րդ հոդվածի և Տեղական ինքնակառավարման մասին օրենքի 26-րդ հոդվածի 1-ին մասի 7-րդ կետի համաձայն` կառավարությունը որոշել է Արմավիրի մարզի Արևադաշտի գյուղական համայնքի ղեկավար Վաչիկ Ասատրյանի լիազորությունները համարել վաղաժամկետ դադարեցված և Արևադաշտի գյուղական համայնքի ընտրատարածքում անցկացնել համայնքի ղեկավարի արտահերթ ընտրություն: Հիշեցենք, որ նախկին գյուղապետ Վաչիկ Ասատրյանը այս տարվա հոկտեմբերին մահացել է, իսկ ներկայիս պաշտոնակատարը Հովսեփ Օհանյանն է: Այսպիսով, հունվարի 9-ին Արևադաշտ գյուղում վերջապես կանցկացվեն գյուղապետի արտահերթ ընտրությունները։ Իսկ գյուղապետի թեկնածուները երկուսն են՝ ներկայիս ժամանակավոր պաշտոնակատար Հովսեփ Օհանյանը և Արմավիրի մարզպետարանի աշխատակազմի ֆինանսական վարչության պետ Արամ Ղազարյանը։ Մեր այն հարցին, թե ինչպես է գնահատւմ իր շանսերը, վերջինս պատասխանեց, որ, բնականաբար, ընտրության գնալուց առաջ բոլորը իրենց հաշվարկներն անում են։ «Մենք մեր հաշվարկներն ունենք, և ընտրությունները ընթանալու են հաստատ համոզմունքով։ Տոկոսային հարաբերությամբ, ես կարծում եմ, հաղթանակը մերն է լինելու»,- համոզմունք հայտնեց Արա Ղազարյանը։ Իսկ հարցին՝ ինքը կուսակցակա՞ն է, թե՞ ոչ, պատասխանեց. «Այո, հանրապետական կուսակցության անդամ եմ»։