Միացյալ Նահանգներն ու Եվրամիությունը զգուշավոր լավատեսություն են ցուցաբերել Իրանի իշխանությունների այն հայտարարության կապակցությամբ, համաձայն որի՝ իրանական կողմը պատրաստ է բանակցություններ սկսել միջուկային ծրագրի շուրջ: Այս մասին հաղորդում է «Ազատություն» ռադիոկայանը:
Հիշեցնենք, որ երեքշաբթի օրը միջուկային ծրագրի բանակցություններոըմ Իրանը ներկայացնող Սայիդ Ջալիլին Եվրամիության արտաքին գերատեսչության ղեկավար Քեթրին Էշթոնին նամակ էր հղել, որում պատրաստակամություն էր հայտնել բանակցություններ սկսել միջազգային հանրության հետ:
Նշվում է, որ երեկ Վաշինգտոնում Քեթրին Էշթոնը և ԱՄՆ պետքարտուղար Հիլարի Քլինթոնը քննարկել են Իրանի հարցը: Հաղորդվում է, որ այդ հանդիպման ժամանակ քննարկվել է նաև Սիրիայի խնդիրը: Քլինթոնն ասել է, որ իր երկիրը շարունակելու է ճնշումները Դամասկոսի վրա, մեկուսացնելու է այդ երկիրը և աջակցելու է երկրի ընդդիմությանը: Նա հաստատել է, որ հաջորդ շաբաթ Թունիսում տեղի կունենա «Սիրիայի բարեկամներ» խմբի հավաքը: