Anonymous-ն այսօր հայտնել է, որ հարձակումներ է իրականացրել ԱՄՆ կառավարական կայքերի վրա` այդ կերպ պայքարելով հեղինակային իրավունքների պաշտպանության վերաբերյալ համաշխարհային համաձայնագրի դեմ:
Ցանցահենային խումբը համացանցում տեղադրված հայտարարության մեջ ասել է, որ նաև հարձակվել է Առևտրային դաշնային հանձնաժողովի սպառողական պաշտպանության բիզնեսի կենտրոնի կայքի վրա:
Associated press-ը գրել է, որ Առևտրի հանձնաժողովը հաստատել է ցանցահենային խմբի տարածած լուրերը` էլեկտրոնային նամակի միջոցով հայտնելով, որ կայքերը չեն աշխատի, մինչ իրենք համոզված լինեն, որ պաշտպանված են հարձակումներից:
Այսօր՝ ավելի վաղ կայքում խումբը տեղադրել էր գերմաներեն մի տեսագրություն, որտեղ ծաղրի էր ենթարկվում ACTA-ն: