ԱՄՆ Կոնգրեսի 112-րդ նստաշրջանում կքննարկվի Լեռնային Ղարաբաղի հիմնահարցը

07 Հունվար, 2011 12:59

Դիտումներ՝ *

Ինչպես հաղորդում է Regnum.ru գործակալությունը` հղում կատարելով ադրբեջանական APA գործակալությանը, ԱՄՆ Կոնգրեսի 112-րդ նստաշրջանի ժամանակ քննարկման հանված հիմնական թեմաների մեջ կլինեն հետևյալ խնդիրները` Ղարաբաղյան հիմնահարցը, Ադրբեջանի էներգետիկ ոլորտի զարգացման հարցը, Հայաստանի տնտեսական զարգացման հարցը և Վրաստանի վերականգնումը 2008թ. Ռուսաստանի հետ պատերազմից հետո: Այս մասին հայտարարել է Եվրասիայի հարցերով փորձագետ Ջիմ Նիկոլը` ԱՄՆ Կոնգրեսում ներկայացված «Հայաստան, Ադրբեջան, Վրաստան. քաղաքական գործընթացները և դրանց ազդեցությունը ԱՄՆ շահերի վրա» զեկույցում:
«Ոմանք կարծում են, որ ԱՄՆ-ն ավելի լուրջ աջակցություն պետք է ցույց տա տարածաշրջանին (Հարավային Կովկաս – 1in.am), որը միավորում է սևծովյան և կասպից տարածաշրջանները, ավելացնի դրա դերակատարությունը որպես առևտրային միջանցք Արևելքի և Արևմուտքի միջև: Նրանք սպասում են ԱՄՆ-ից ավելի մեծ աջակցություն` պատերազմների, հանցագործությունների կանխարգելման, ահաբեկչության, մաքսանենգության դեմ պայքարի, պետությունների անկախությանն աջակցության, ինչպես նաև հակամարտությունների կարգավորման գործում: Մյուսներն էլ կոչ են անում ավելի զգույշ լինել քաղաքականության ընտրության գործում, որը թույլ կտա ավելացնել ԱՄՆ դերակատարությունը մի տարածաշրջանում, որը տուժում է էթնիկական և քաղաքացիական հակամարտություններից»,- հայտարարել է Նիկոլը:
Զեկուցողը հատուկ շեշտել է Ադրբեջանի և Վրաստանի դերակատարությունը Իրաքի դեմ պատերազմում` հայտարարելով, որ այս երկրներն անվերապահորեն իրենց աջակցությունն են հայտնել կոալիցիոն զորքերին: