Բրիտանական MI-5 հետախուզությունը բացել է Չարլի Չապլինի գործը, որը վերաբերում է այն ժամանակաշրջանին, երբ FBI գործակալները հետևում էին դերասանին կոմունիստների նկատմամբ ունեցած համակրանքի պատճառով:
Ինչպես գրում է բրիտանական The Guardian թերթը, FBI-ը MI-5-ից օգնություն է խնդրել՝ «Նոր ժամանակներ» և «Մեծ բռնակալ» ֆիլմերի դերասանին որակելով որպես «հոլիվուդյն բոլշևիկ»:
«Չապլինը միջոցներ է տրամադրել կոմունիստական կազմակերպություններին»,- ասվում է MI-5-ի սպաներից մեկի՝ 1952 թ. հոկտեմբերին Վաշինգտոն ուղարկված զեկույցում:
MI-5- ում նշել են, որ 1942 թ. Լոս Անջելեսում Ամերիկա-խորհրդային բարեկամության ազգային խորհրդի մասնաճյուղում Չապլինը հայտարարել է. «Կոմունիզմը շատ լավ կողմեր ունի: Մենք կարող ենք օգտագործել լավը և մի կողմ դնել վատը»:
Գործին կցված են նաև թերթերից և ամսագրերից վերցված էպիզոդներ: Նշվում է, որ Չապլինը չի ընդունել ԱՄՆ քաղաքացիություն, չնայած ավելի քան 30 տարի ապրել է ԱՄՆ-ում:
Չապլինի գործն ավարտվում է հետևյալ եզրակացությամբ. «Հնարավոր է, որ Չապլինը կարեկցանք էր տածում կոմունիստների նկատմամբ, սակայն, համաձայն մեր տեղեկության, նա ավելի շուտ կարող է համարվել ոչ ավելի, քան «առաջադիմական» կամ ռադիկալ»:
1953 թ. ԱՄՆ իշխանությունները Չապլինին չթույլատրեցին վերադառնալ ԱՄՆ: Չնայած նա հերքում էր, որ երբևէ կոմունիստ է եղել, բայց որոշեց չվիճարկել ԱՄՆ իշխանությունների որոշումը և մնաց ապրելու Շվեյցարիայում, որտեղ էլ և մահացավ 1977 թ.: