Ամերիկացի հայտնի երգիչներ Արետա Ֆրանկլինը և Սթիվի Ուանդերը պատրաստվում են երգել շաբաթ օրը կայանալիք Ուիթնի Հյուսթոնի հրաժեշտի արարողության ժամանակ: Այս մասին Associated Press գործակալությանը հայտնել է Հյուսթոնի ներկայացուցիչ Քրիստեն Ֆոսթերը:
Անցած շաբաթ դեռ անհայտ պայմաններում մահացած Ուիթնի Հյուսթոնի հուղարկավորությունը կկայանա այս շաբաթ օրը նրա ծննդավայր Նյու Ջերսիում՝ միայն նրա մերձավորների մասնակցությամբ: Հուղարկավորության արարողությունը հեռարձակվելու է համացանցում:
Հայտնի է, որ հուղարկավորությանը ներկա կգտնվեն նրա նախկին ամուսինը` Բոբի Բրաունը, «Թիկնապահ» ֆիլմում Ուիթնիի խաղընկեր Քևին Քոստները և հաղորդավար Օփրա Ուինֆրին: Հյուսթոնի հարազատները որոշել են հոգեհանգստի արարողություն չանցկացնել Prudential Center մարզահամերգային համալիրում, որին կարող էին ներկա գտնվել նաև երգչուհու հազարավոր երկրպագուները:
