Թուրքագետ Արտակ Շաքարյանը օրեր առաջ հայտարարել էր, որ ԱՄՆ-ում քննարկվում է հայ-թուրքական հարաբերությունների բարելավման մի նոր տարբերակ, համաձայն որի` Հայաստանը բացում է սահմանը Նախիջևանի հետ, Թուրքիան բացում է սահմանը Հայաստանի հետ: Երևանը թույլ է տալիս, որ երկաթգիծը Կարսով մտնի Գյումրի, սրանով Հայաստանը ապաշրջափակում է Նախիջևանը, իսկ Թուրքիան ապաշրջափակում է Հայաստանը: «Առաջին լրատվականը» ԱԺ «Ժառանգություն» խմբակցության ղեկավար Ստեփան Սաֆարյանից հետաքրքրվեց, թե ինչ կարող է տալ այդ տարբերակը կյանքի կոչելը հայկական կողմին: Ստեփան Սաֆարյանը այդ տարբերակը համարում է ոչ իրատեսական: Նա կարծիք հայտնեց, որ այդ տարբերակով փորձ է արվում բավարարել Ադրբեջանի և Թուրքիայի հավակնությունները: Միաժամանակ կարծում է, որ Նախիջևանի սահմանի բացումը չի կարող լինել Ադրբեջանին բավարարող պայման: Ստեփան Սաֆարյանը հիշեցնում է, որ հայ-թուրքական արձանագրությունների բովանդակության հետ կապված եղան բողոքի ակցիաներ, հիմնականում ընդվզեցին Դաշնակցությունը, «Ժառանգությունը» և մի քանի հասարակական կազմակերպություններ: Մեր զրուցակիցը չբացառեց, որ սահմանը բացելու ցանկություն իսկապես եղել է, եթե նկատի ունենանք, որ արձանագրությունների դեմ աղմուկից հետո էլ հայ-թուրքական հարաբերությունների բարելավումը շարունակում է մնալ օրակարգային: