Գյումրիի «Շիրակ»-ի դարպասապահների մարզիչը ակումբի պաշտոնական կայքին տված հարցազրույցում խոսեց արտասահմանցի դարպասապահների հետ կապված ՀՖՖ-ի կայացրած որոշման, ինչպես նաև թիմի դարպասապահների մարզավիճակի մասին.
– Ես միանշանակ կողմ եմ այդ որոշմանը: Դա շատ լավ է, քանի որ կսկսենք վստահել մեր հայ դարպասապահներին, տղաներին հնարավորություն կտրվի ավելի շատ խաղալ, եւ նրանցից յուրաքանչյուրը կձգտի անել ամեն ինչ, որպեսզի հայտնվի ազգային հավաքականում: Եվ արդեն դարպասապահների ընտրությունը մեծ կլինի:
– Ի՞նչ մարզավիճակում են գտնվում մեր դարպասապահները:
– Ես երկուսից էլ շատ գոհ եմ: Թե´ Արթուր Հարությունյանը, թե´ Նորայր Աբրահամյանը այժմ գտնվում են շատ լավ մարզավիճակում, շատ եռանդով են մասնակցում ամեն մի մարզմանը: Երկուսն էլ շատ աշխատասեր դարպասապահներ են:
– Արդեն չորս ստուգողական հանդիպում եք անցկացրել այս երեք ուսումնամարզական հավաքների ժամանակ: Ի՞նչ կասեք դարպասապհների մասին: Կատարու՞մ են արդյոք նրանք ձեր բոլոր առաջադրանքները:
– Նրանք հանդիպումների ժամանակ ամեն ինչ շատ ճիշտ են անում: «Արարատ»-ի հետ հանդիպմանը Նորայր Աբրահամյանը անառիկ պահեց դարպասը` մի քանի անգամ փրկելով թիմին գոլից: Նա շատ վստահ խաղաց այդ օրը: «Զակարպատիե»-ի հետ հանդիպման առաջին խաղակեսին հուսալի խաղաց Արթուր Հարությունյանը: Ճիշտ է, մենք երկու գոլ բաց թողեցինք, սակայն այնտեղ այդքան էլ դարպասապահի սխալից կախված չէր: Նորայր Աբրահամյանը երկու դրվագում էլ կատարեց ցուցումները:
– Իսկ ինչպե՞ս են համագործակցում դարպասապհները պաշտպանների հետ:
– Ճիշտ է, Արթուր Հարությունյանը նոր է թիմում, սակայն նա այնքան շուտ ընտելացավ մեր խաղաոճին, որ այդ ամենը շատ արագ ստացվեց: Նա հիանալի է հասկանում պաշտպաններին և շատ լավ է ստացվում համագործակցությունը: Իսկ ինչ վերաբերում է Նորայր Աբրահամյանին, ապա նա վաղուց է հանդես գալիս «Շիրակ»-ում և շատ լավ է հասկանում ցանկացած խաղացողի: Ես լիովին վստահում եմ մեր դարպասապհներին: