Իսրայելի հատուկ ծառայությունները Սինգապուրի իրենց գործընկերների օգնությամբ կանխել են Իսրայելի պաշտպանության նախարար Էհուդ Բարաքի դեմ մահափորձը: Այս մասին գրում է իսրայելական Yediot Akhronot թերթը՝ վկայակոչելով քուվեյթյան մամուլը:
Համաձայն այդ լուրերի՝ քաղաքական գործչի սպանությունը պետք է իրականացվեր Սինգապուրում, որտեղ Բարաքը մասնակցում էր միջազգային ավիաշոուի:
Դեռ մինչ նախարարի ժամանումը իսրայելական հատուկ ծառայությունները Սինգապուրի իշխանություններին էին հանձնել «միանգամայն գաղտնի տվյալներ մի խումբ մարդասպանների մասին, որոնց թվում կային իրանցիներ ու լիբանանցիներ»: Բարեհաջող գործողությունների արդյունքում ձերբակալվել է 3 կասկածյալ: Այժմ «Մուսադ»-ը ակտիվորեն մասնակցում է նրանց հարցաքննություններին:
Հաղորդվում է նաև, որ ենթադրյալ մարդասպաններն իրենց տրամադրության տակ ունեցել են Բարաքի տեղաշարժվելու «միանգամայն ճշգրիտ» գրաֆիկը: Նրանք նախատեսում էին հետևել նրան և սպանել հյուրանոցում:
Հիշեցնենք, օրերս մահափորձեր կազմակերպվեցին Վրաստանում, Հնդկաստանում, Ադրբեջանում և Թաիլանդում Իսրայելի դիվանագետների դեմ, որի մեջ Իսրայելը մեղադրում է Իրանին:
