Քաղաքական դաշտում այսօր բոլորն իրենց դերն են խաղում: Այսօր կայացած մամուլի ասուլիսի ժամանակ այս մասին ասաց Հայաստանի Կոմունիստական կուսակցության ղեկավար Ռուբեն Թովմասյանը:
Նրա խոսքով՝ Հայաստանի Կոմունիստական կուսակցությունն ամենահավասարակշռված քաղաքական ուժերից է:
«Մենք աստիճանաբար պատրաստվում ենք առաջիկա ընտրություններին: Կան որոշ դժվարություններ, որոնք պետք է փորձենք հաղթահարել: Նախ, չեմ հասկանում` ինչու բարձրացրեցին ընտրագրավի չափը` այն հասցնելով 8 միլիոն դրամի: Բայց հանգանակություններ են սկսվել, կան առանձին մարդիկ, ովքեր պատրաստ են գրավի հարցում օգնել մեզ:
Ինչ վերաբերում է ցուցակներին, ապա դրանք կհաստատենք մարտին կայանալիք կենտրոնական պլենումում: Մինչ այդ մենք հաճախ ենք լինում շրջաններում, հանդիպում ընտրողների հետ: Այդ հանդիպումները ցույց են տալիս, որ ժողովուրդը կարոտ է սոցիալիստական գաղափարախոսությանը: Նրանք ուղղակի խնդրում են վերադարձնել խորհրդային կարգերը, թեկուզ դրանք հաճախ բռնապետական են որակվում: Մարդկանց ավելի քան 50 տոկոսն աղքատ է»,- ասաց Թովմասյանը:
Անդրադառնալով երեկ ԱԺ-ում հարյուր տոկոսանոց համամասնական ընտրակարգի շուրջ կազմակերպված լսումներին` նա հայտարարեց, որ ՀԿԿ-ն կողմ է այդ ընտրակարգին: «Բայց ո՞վ էր որոշել այդ լսումներին չհրավիրել նաև մեր կուսակցության ներկայացուցիչներին: Տեսանք, թե ովքեր էին նստած դահլիճում: Միաժամանակ, չկա ավելի լավ համակարգ, քան համամասնական ընտրակարգը, որով կուսակցությունը պատասխանատու կլինի իր յուրաքանչյուր ներկայացուցչի համար»,- ասաց նա:
Ռուբեն Թովմասյանը նշեց նաև, որ համագործակցության առաջարկով իրենց է դիմել Առաջադիմական կոմունիստական կուսակցությունը, իսկ ահա Միավորված կոմունիստական կուսակցության հետ համագործակցության ուղիները սառեցված են:
«Առաջադիմականի հետ մենք արդեն իսկ որոշակի միջոցառումներ ենք իրականացրել, հետագա համագործակցության մասին կորոշենք հավելյալ: Դաշինք, բացի կոմունիստներից, ուրիշ ոչ մի ուժի հետ չի լինելու, և ես կարծում եմ, որ շռնդալից մուտք ենք ունենալու ԱԺ»:
