«Բարգավաճ Հայաստան» կուսակցության մամուլի քարտուղարը արդեն հասցրել է հերքել կուսակցության կապը Ռոբերտ Քոչարյանի հետ, բայց դա, ըստ երևույթին, մի ստվեր է, որը ԲՀԿ-ի վրա կմնա բավական երկար ժամանակ և առնվազն խորհրդարանական ընտրարշավի ամբողջ ընթացքում:
Բանն այն է, որ երբ կուսակցությունը որոշում է կայացնում նախկին արտգործնախարար Վարդան Օսկանյանին ԲՀԿ շարքերն ընդգրկելու մասին, դրանից հետո, մեղմ ասած, շատ դժվար է համոզել, որ ԲՀԿ-ն Քոչարյանի հետ կապ չունի: Նույնիսկ քաղաքականությունից հեռու մարդիկ են շատ լավ պատկերացնում, որ Վարդան Օսկանյանը չի եղել և հազիվ թե լինի ինքնուրույն քաղաքական գործիչ, որը կհամարձակվեր Հայաստանի համար ներքաղաքական և ներիշխանական ներկայիս կարևոր և գրեթե պատմական պահին մտնել քաղաքականություն, այն էլ մի կուսակցություն, որը բավական սուր հակադրության մեջ է Սերժ Սարգսյանի հետ: Վարդան Օսկանյանն այդ բանը կարող էր անել միայն շատ ավելի լուրջ թիկունք ունենալու պարագայում, ինչն էլ նրա դեպքում, անկասկած, Ռոբերտ Քոչարյանն է:
Իհարկե, այս տեսանկյունից հետաքրքիր կլիներ լսել հենց Քոչարյանին: Բնական է, որ նա անպայմանորեն կփորձի հերքել իր ազդեցությունը Օսկանյանի վրա, նաև իր կապը «Բարգավաճ Հայաստան»-ի հետ: Մյուս կողմից, սակայն, անկասկած է, որ Քոչարյանն ինչ-որ մեսիջով պետք է ցույց տա, որ Վարդան Օսկանյանի և «Բարգավաճ Հայաստան»-ի փոխհարաբերության հաստատման «կնքահայրն» այնուամենայնիվ ինքն է: Թեև դա ըստ էության մի իրավիճակ է, երբ անգամ ցույց չտալու դեպքում բոլորի մոտ կա այդ համոզումն ու ընկալումը, և Քոչարյանին ու ԲՀԿ-ին այլ բան չի մնում, քան հանրությանը տարհամոզելու համար կամ բացահայտորեն դուրս գալ միմյանց դեմ, կամ էլ պարզապես պաշտոնականացնել իրենց հարաբերությունները և այլևս չսեթևեթել, ինչպես կասեր Գալուստ Սահակյանը, այլ զբաղվել արդեն կոնկրետ քաղաքականությամբ, որ մյուս բոլորն էլ իմանան իրենց անելիքը, այդ թվում, իհարկե, առաջին հերթին Հայաստանի հասարակությունը: Այնպես որ, խոսքերն արդեն ավելորդ են: Եթե «Բարգավաճ Հայաստան»-ն, օրինակ, կապ չունի Ռոբերտ Քոչարյանի հետ, ապա կարող է այդ ամենն ապացուցել գործով, առավել ևս, որ փորձում է համոզել իր խոսքի և գործի կապը: Այդ դեպքում արժե պարզապես տալ Ռոբերտ Քոչարյանի նախագահության քաղաքական գնահատականը, ու այդ գնահատականից արդեն պարզ կլինի, թե ինչ կապ կա Քոչարյանի և «Բարգավաճ Հայաստան»-ի միջև:
