«Աժ ՀՀԿ խմբակցության ղեկավար Գալուստ Սահակյանի հովանավորյալ լինելը, պարզվում է, կարող է անհավանական հնարավորություններ բացել մարդկանց առաջ: Այդպիսի մարդկանցից մեկը Գյումրիի ավագանու հանրապետական անդամ Գագիկ Ադամյանն է: Ավագ սերնդի գյումրեցիները պնդում են, որ Ադամյանը մասնագիտությամբ հացթուխ է, և որպես հավելյալ փաստարկ ասում, որ նրան հիշում են «Թունդիրի Գագո» մականունով»,- գրում է «ՀԺ»-ն և հավելում.
«Չնայած այսպիսի մասնագիտական անցյալին, Գագիկ Ադամյանը նշանակվել է Գյումրիի էնրիկո Մատտեի անվան իտալական պոլիկլինիկայի տնօրենի պաշտոնակատար: Ըստ որոշ տեղեկությունների` նման նշանակման պատճառն այն է, որ Ադամյանը հովանավորվում է Գալուստ Սահակյանի կողմից: Ինչպես հայտնի է, Սահակյանի աներձագը՝ Բուռնաշ մականունով հայտնի Աշոտ Աղաբաբյանը, Գյումրիից է Աժ պատգամավոր ընտրվել, և թերևս ընտրություններում Աղաբաբյանին աջակցելու շնորհիվ է Ադամյանը Սահակյանի աչքը մտել, վերջինս էլ երևի առողջապահության փոխնախարար որդուն խորհուրդ է տվել աջակցել հացթուխի նշանակմանը՝ պոլիկլինիկայի տնօրենի պաշտոնում:
Ի դեպ, Շիրակի մարզպետարանում չեն էլ թաքցնում, որ պոլիկլինիկայի տնօրենի պաշտոնակատար են նշանակել հացթուխի, չեն էլ թաքցնում, որ դա արել են Սահակյան-Աղաբաբյան տոհմի միջնորդությամբ: Ինքը՝ Ադամյանը, երեկ մեր թղթակցի այն հարցին, թե ինչ մասնագիտություն ունի, պատասխանել է երկար մտածելուց հետո: «Տնտեսագետ»,- ասել է նա` հավաստիացնելով, թե ունի բարձրագույն կրթություն: Իսկ հարցին, թե որքանով են իրականությանը համապատասխանում լուրերը, թե ինքը հացթուխ է, Ադամյանը պատասխանել է. «Քեզ ինչ: Համ էլ հացթուխը դու ես»: Իսկ ճի՞շտ է արդյոք, որ իրեն հովանավորում է Գալուստ Սահակյանը: «Իյա, քեզ ինչ, ով է ինձ հովանավորում, պա-կա»,- այս հարցին էլ այսպես է պատասխանել Ադամյանը ու անջատել հեռախոսը:
Իսկ Գյումրիի իտալական պոլիկլինիկայի տնօրենի պաշտոնակատարի անձը մեզ սկսեց հետաքրքրել այն տեղեկությունների ֆոնին, որ նա քաղաքական դրդապատճառներով մարդկանց ազատում է աշխատանքից»:
«Ուշ երեկոյան մեր թերթի երևանյան թղթակիցը կրկին զանգահարեց պարոն Ադամյանին և մի բանի հետաքրքիր տեղեկություններ ևս պարզեց: Մասնավորապես, Գագիկ Ադամյանը 2006 թվականին, 46 տարեկան հասակում ավարտել է «Մենեջմենթի համալսարան» անունով մասնավոր բուհը: Ներկայումս նա ուսանողի կարգավիճակ ունի, սովորում է առողջապահության կառավարման ակադեմիայի մագիստրատուրայում: Բուհն ավարտելու է երկու ամսից, և թերևս միայն սրանից հետո կլինի ոչ թե իտալական պոլիկլինիկայի տնօրենի պաշտոնակատար, այլ հենց տնօրեն: Բայց որպեսզի այս տեսլականն իրականություն դառնա, նախ հարկավոր Է, որ իր հարազատ Հանրապետական կուսակցությունը պահպանի իշխանությունը»,- հավելում է «ՀԺ»-ն:
