ԱՄՆ պետքարտուղար Հիլարի Քլինթոնը չի պատրաստվում ղեկավարել Համաշխարհային բանկը, որի մասին հայտարարվել էր նախօրեին: Այս մասին «Ազատություն» ռադիոկայանին հայտնել է պետքարտուղարության պաշտոնական ներկայացուցիչ Վիկտորյա Նյուլանդը:
Համաշխարհային բանկի ներկայիս նախագահ Ռոբերտ Զելիկի հրաժարականի մասին հաղորդագրության մեջ ասվում է, որ նա պատմական դերակատարություն է ունեցել համաշխարհային ճգնաժամի ընթացքում: Զելիկը չի ցանկացել երկարաձգել իր պաշտոնավարումը Համաշխարհային բանկում 5-ամյա ժամկետը լրանալուց հետո:
Ավելի վաղ ԱՄՆ ֆինանսների նախարար Թիմոթի Գայտներն ասել էր, որ Միացյալ Նահանգներն իր թեկնածուն անպայման կունենա, սակայն, ավանդույթի համաձայն, այդ պաշտոնի համար մրցույթ անցկացնելուց հետո: