Երեկ Կենտրոն եւ Նորք-Մարաշ վարչական շրջանների առաջին ատյանի դատարանում ցուցմունք տվեց «Վաղարշ եւ որդիներ» (ոսկու շուկայի) ընկերության տնօրեն Վաղարշ Աբրահամյանի որդին` ամբաստանյալ Արտյոմ Աբրահամյանը: Հիշեցնենք, որ նա մեղադրվում է զենքի գործադրմամբ խուլիգանություն անելու, դիտավորությամբ առողջությանը ծանր վնաս պատճառելու, ապօրինի զենք կրելու մեջ: Առաջադրված մեղադրանքներում նա իրեն լիովին մեղավոր ճանաչեց, բայց ասաց, որ դեպքի մանրամասները չի հիշում. պարզապես տեսնելով, որ եղբորը` Արթուրին խփում են, մի անգամ օդ է կրակել, հետո երկու անգամ` եղբորը խփողների ուղղությամբ, որից մեկը դիպել է Արտյոմ Բաղյանի ոտքին: Մեղադրողի հարցին, թե ինչի՞ց է ծեծկռտուքը սկսվել, Ա.Աբրահամյանն ասաց, որ չի հիշում, զենքի ձեռքբերման աղբյուրի եւ այն դեպքի վայր տանելու պատճառի մասին հարցերին ամբաստանյալը նախընտրեց չպատասխանել: Դեպքից անմիջապես հետո մեկնել է երկրից, հայտնաբերվել Կիեւում եւ բերման ենթարկվել Հայաստան: Տուժողներից Պավել Խաչատրյանը չէր ներկայացել դատարան. տեղեկություն էր ստացվել դատարան, որ նա ընտանիքով ՌԴ-ում է, երկրորդ տուժողը եւս, որը նաեւ որպես մեղադրյալ էր ներգրավված եղել, չէր եկել դատարան, քանի որ պարտքուպահանջ չուներ Աբրահամյաններից, նրա բուժման ծախսերը հոգացել էին: Իսկ նրա մեղադրանքի մասը կարճվել էր, քանի որ նա մարմնական վնասվածքներից եւ վիրահատությունից հետո դադարել էր հանրության համար վտանգ ներկայացնել: Այս գործից մի քանի մասեր են անջատվել առանձին վարույթ, մի մասը կարճվել է, իսկ ամբաստանյալներից Սերգեյ Մնացականյանը դեռ հետախուզման մեջ է: Հիշեցենք, որ վեճի պատճառն, իբր, Աբրահամյաններից մեկի ավտոմեքենայի վրա «թքելն էր» եղել, ինչը հետո վերածվել էր հանցագործության: Դատաքննության փուլն ավարտվեց. հաջորդ նիստին կճառեն: