Աջափնյակ և Դավթաշեն վարչական շրջանների ընդհանուր իրավասության դատարանում` դատավոր Վազգեն Ռշտունու նախագահությամբ, այսօր շարունակվեց հասարակական լայն հնչեղություն ձեռք բերած և տուժած բնակիչների կողմից երկար սպասված «Նորաշեն 2007»-ի գործով դատավարությունը: Դատարանի դահլիճում էին ավելի քան 130 տուժողներ, որոնք այսօր էլ հիասթափված լքեցին դատարանի դահլիճը, քանի որ նիստը դեռ չսկսված հետաձգվեց:
Այս գործով առաջին դատական նիստը տեղի էր ունեցել փետրվարի 1-ին, որի ընթացքում որոշվել էր դատաքննության հերթականությունը և լուծվել էր 6 մեղադրյալներից մեկին պաշտպանով ապահովելու հարցը: Սակայն այսօրվա նիստում նշված մեղադրյալի համար նշանակված պաշտպան Աղաջանյանը դատական նիստը հետաձգելու վերաբերյալ միջնորդություն ներկայացրեց դատարանին, որպեսզի ժամանակ ունենա ծանոթանալու գործի նյութերին: Դատավորը բավարարեց պաշտպանի միջնորդությունը և հետաձգեց դատական նիստը մինչև մարտի 5-ը:
Հիշեցնենք, որ այս գործի շուրջ աղմուկ էր բարձրացել այն բանից հետո, երբ պարզվել էր որ 120-ից ավելի ընտանիքներ «Նորաշեն-2007» սպառողական կոոպերատիվին գումար են վճարել նորակառույցում բնակարան ունենալու նպատակով, բայց հետագայում պարզել են, որ իրենց խոստացված բնակարանները այլ մարդկանց են վաճառվել:
Գործով որպես տուժող և վկա անցնում են շուրջ երեք հարյուր անձինք: Գործի հետ կապված շրջանառվում են մի շարք բարձրաստիճան անձանց անուններ, որոնք էլ, ըստ բնակիչների, մեղավոր են իրենց հետ տեղի ունեցածի համար: Համապատասխան քրեական գործը քննեց Հատուկ քննչական ծառայությունը: Իսկ անցած տարվա վերջին ազդարարվեց այս գործով նախաքննության ավարտի և քրեական գործը դատարան ուղարկելու մասին: Արդյունքում ամբաստանյալի աթոռին նստած են վեց հոգի:
Նշենք, որ այս գործով տասնյակ խաբված բնակիչներ պնդում են, որ իրենց բնակարանները կոոպերատիվի սեփականատերերը մոտ 300 հազար դոլարի դիմաց որպես գրավ տվել էին ՀՀԿ պատգամավոր Հերմինե Նաղդալյանի ամուսնուն` Դավիթ Բեգլարյանին, որն, ի դեպ, արդեն ազատվել է Արարատի մարզի հարկայինի պետի պաշտոնից: Նշենք, որ համապատասխան քրեական գործը քննվել է Հատուկ քննչական ծառայությունում, իսկ գործով նախաքննության ավարտի և քրեական գործը դատարան ուղարկելու մասին որոշումը կայացվել է 2011 թվականի վերջին: Հատուկ քննչականը ևս հաստատել էր այն փաստը, որ այդ բնակարանները ձևակերպված են եղել Հերմինե Նաղդալյանի ընտանիքի անդամների անուններով: Ճիշտ է, բնակարաններից մի քանիսն արդեն վերադարձվել են նախկին տերերին, սակայն որոշ բնակիչներ դատարանում դեռ պետք է պայքարեն իրենց բնակարանները ետ ստանալու համար:
ՀՀ ՀՔԾ-ի կողմից գործի վերաբերյալ նախկինում տարածված հաղորդագրության մեջ ասվում էր, որ մինչդատական վարույթում ձեռք բերված ապացույցների հիման վրա կոոպերատիվի նախագահ Ա. Թադևոսյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով և 205-րդ հոդվածի 2-րդ մասով, Լ. Սամվելյանին՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով, Ա. Մարտիրոսյանին՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով և 213-րդ հոդվածի 2-րդ մասի 1-ին և 2-րդ կետերով, Ց. Պետրոսյանին՝ ՀՀ քրեական օրենսգրքի 38-178-րդ հոդվածի 3-րդ մասի 1-ին կետով, իսկ Վ. Օհանյանին և Դ. Երեմյանին՝ ՀՀ քրեական օրենսգրքի 213-րդ հոդվածի 2-րդ մասի 1-ին և 2-րդ կետերով:
