Մարտի 1-ի զոհերից Տիգրան Խաչատրյանի մոր՝ Ալլա Հովհաննիսյանի համար բոլորովին էլ անսպասելի չէր, որ ՀՀ նախկին արտգործնախարար Վարդան Օսկանյանը ԲՀԿ անդամ դառնալու ցանկություն է հայտնել: Այս մասին նա ասաց «Առաջին լրատվական»-ի հետ զրույցում:
«Օսկանյանը Ռոբերտ Քոչարյանի մարդն է, իսկ ԲՀԿ-ն էլ՝ նրա կուսակցությունը: Ինչո՞ւ, ուրեմն, Օսկանյանը չպետք է գնար այդ կուսակցություն: Այնպես որ, նրանք մի շղթայով կապված են իրար՝ երևա դա, թե ոչ: Հիմա այդ կապն ավելի ակնհայտ է դառնում: Մարտի 1-ից հետո ես Օսկանյանին Քոչարյանից չեմ բաժանել, որովհետև նրանք երկուսն էլ հավասար պատասխանատվություն են կրում մարտի 1-ի համար»,- նկատեց Ալլա Հովհաննիսյանը:
Նրա խոսքով՝ Ռոբերտ Քոչարյանը գիտակցում է, որ իր վերադարձով մեծ վնաս կհասցնի ԲՀԿ-ին և կուսակցությունն իր պատճառով մեծ ընտրազանգված կկորցնի, դրա համար էլ գերադասում է ոչ թե անձամբ մուտք գործել ԲՀԿ, այլ այնտեղ ուղարկել Վարդան Օսկանյանին:
«Քոչարյանը մտածում է, որ Օսկանյանը ավելի մեղմ անձնավորություն է և ոչ միայն վնաս չի հասցնի, այլև «պլյուս» կբերի ԲՀԿ-ին: Միաժամանակ, իմ կարծիքով, շատ մարդիկ Օսկանյանի անդամակցությունից հետո ԲՀԿ-ին այլևս ձայն չեն տա»,- ասաց Ալլա Հովհաննիսյանը:
Ամփոփելով՝ նա ընդգծեց, որ Ռոբերտ Քոչարյանը մարտի 1-ի թիվ մեկ մարդասպանն է, և ժողովուրդը նրան տեսնել չի ուզում: «ԲՀԿ-ին մարտի 1-ի իրադարձություններից չեմ անջատում: Այդ կուսակցությունը ևս պատասխանատվություն է կրում և մեղավոր է մարտի 1-ի ոճրագործության համար»:
