Քաղտեխնոլոգ Կարեն Քոչարյանը, իր իսկ խոսքերով, «մեռած կուսակցություններին», այս դեպքում՝ ՕԵԿ-ին չի մեկնաբանում: Այս մասին նա ասաց «Առաջին լրատվական»-ի հետ զրույցում՝ մեկնաբանելով այդ կուսակցության ղեկավար Արթուր Բաղդասարյանի այն հայտարարությունը, թե առաջիկա ընտրություններից հետո ՕԵԿ-ն Ազգային ժողովում բավականին ծանրակշիռ ներկայություն կունենա:
«Մեռածների մասին կամ լավը պետք է խոսես, կամ ոչինչ: Տվյալ պարագայում ես գերադասում եմ ոչինչ չասելը»,- ասաց Քոչարյանը:
Նշենք, որ ՕԵԿ նախագահ Արթուր Բաղդասարյանը հայտարարել է, որ ընտրությունների արդյունքում կուսակցությունը մեծացնելու է ԱԺ-ում իր ներկայությունը: «Մեր մոտեցումը շատ հստակ է, մենք վստահ ենք մեր հաղթանակի մեջ, մենք ամպագոռգոռ հայտարարություններ չենք անում: Մենք կբավարարվենք այն իրական հանրային աջակցությամբ, որը մեզ կտա մեր ժողովուրդը, բայց հավատացած եղեք, որ այդ հանրային աջակցության աստիճանը բավականին բարձր է, և դա ցույց է տալիս մեր անցած ճանապարհը և նաև մեր հավաքած քվեները: Սա է ճշմարտությունը: Ես այսօր չեմ ուզում տոկոսներ ասել, բայց մենք կունենանք բավականին ծանրակշիռ ներկայություն Ազգային ժողովում, ավելին քան հիմա է»,- ասել է նա:
