Սուրբ Ծննդյան տոնը Հայ առաքելական եկեղեցին նշում է հունվարի 6-ին: Հունվարի 5-ի երեկոյան Հայ առաքելական եկեղեցիներում մատուցվում է Սուրբ Պատարագ և կատարվում է ճրագալույցի արարողությունը: Պատարագից հետո հավատացյալ ժողովուրդը վառ ճրագները, մոմերը տուն է տանում` ի նշան Քրիստոսի ծննդյան: «Վառվող ճրագները տուն տանելը նաև մեկ այլ խորհուրդ ունի, որովհետև տան անդամներից բոլորը չէ, որ կարող են եկեղեցի գալ և օրհնություն ու ավետիս ստանալ»,- նշում է Նորք-Մարաշի Ս. Աստվածածին եկեղեցու հոգևոր հովիվ Զաքարիա Քահանա Ավետիսյանը:
Հունվարի 6-ի առավոտյան, ժամը 11-ին տեղի կունենա Ս. Ծննդյան պատարագը, որի ժամանակ կտրվի Ծննդյան ավետիսը: «Պատարագի ժամանակ Հայ առաքելական բոլոր եկեղեցիներում ընթերցվում է Վեհափառ Հայրապետի օրհնության և ողջույնի գիրը և պատարագի ավարտին կատարվում է ջրօրհնեքի կարգը` ի նշան Քրիստոսի մկրտության»,- նշում է հոգևոր հովիվը:
Հավատացյալները` քահանայի գլխավորությամբ և սարկավագի քարոզությամբ խնդրում են Տիրոջը, որպեսզի նա Միածնի շնորհներով ջրին տա Հորդանանի օրհնությունը, Սուրբ Հոգին իջնի ջրի վրա, և այնտեղ մկրտվողները լինեն ճշմարտության և լույսի որդիներ: Ապա քահանան ժողովրդի խնդրանքները ներկայացնում է Տիրոջն ու խնդրում, որ Նա օրհնի ջուրը` այն օգտակար դարձնելով տների շինության, հիվանդների բժշկության, մարդկանց մաքրության, հոգիների ու մարմինների փրկության և այլ կարիքների համար: Այնուհետև քահանան խաչն իջեցնում է ջուրը, ապա խաչը հանում և ջուրն օրհնում խաչի նշանով և ս. մյուռոնով, որից հետո ջուրը բաժանում է ժողովրդին: